Qazaqstanda memlekettik boryshty basqarý tártibin retteý tásilder ázirlenedi
NUR-SULTAN. QazAqparat – Qazaqstanda memlekettik boryshty basqarý tártibin arttyrýǵa baǵyttalǵan tásilder ázirlenedi. Bul jaıynda Májilis depýtattarynyń saýalyna QR Premer-Mınıstriniń birinshi orynbasary Álıhan Smaıylovtyń jaýabynda aıtylǵan, dep habarlaıdy QazAqparat tilshisi.
«Búginde Qazaqstanda boryshtyq ornyqtylyqty baǵalaý kezinde Eýrazııalyq ekonomıkalyq odaq týraly shartta, Ulttyq qor qarajatyn qalyptastyrý jáne paıdalaný tujyrymdamasynda jáne Jańa bıýdjet saıasaty tujyrymdamasynda belgilengen boryshtyq kovenanttar qoldanylady. Tıisti kovenanttarda negizgi baǵyttar men ındıkatıvtik parametrler reglamenttelgen, olardy ustaý memlekettik borysh deńgeıin qaýipsiz mánderde ustap turýǵa baǵyttalǵan», - delingen birinshi vıtse-mınıstr jaýabynda.
Onyń atap ótýinshe, budan basqa memlekettiń boryshtyq mindettemelerin retteý quraldarynyń biri - lımıtteý. Jyl saıyn respýblıkalyq bıýdjet týraly zańda qaryz alý, memlekettik kepildikter men kepilgerlikterdi berý lımıtteri belgilenedi.
«Bul rette, Qazaqstan Respýblıkasynyń Prezıdentiniń janyndaǵy reformalar jónindegi Joǵary keńestiń makroekonomıkalyq saıasat jónindegi komıtetiniń otyrystarynda memlekettik boryshty basqarý máselesi de qaralýda. Sondaı-aq, Úkimet eldiń memlekettik boryshty basqarýdy jetildirý maqsatynda normatıvtik quqyqtyq aktilerge túzetýlerdi pysyqtaýda. Osyǵan baılanysty, memlekettik boryshty basqarý tártibin arttyrýǵa baǵyttalǵan tıisti tásilder ázirlenetin bolady jáne jańa bıýdjet saıasatynyń 2030 jylǵa deıingi tujyrymdamasyn ózektendirý sheńberinde óz kórinisin tabady», - dep atap ótedi Álıhan Smaıylov jaýabynda.
