Qazaqstanda memlekettik basqarý júıesi jappaı tsıfrlandyrylmaq

NUR-SULTAN. QazAqparat – Qazaqstanda Memlekettik basqarýdy damytýdyń 2030 jylǵa deıingi tujyrymdamasy ázirlendi. Bul týraly Strategııalyq josparlaý jáne reformalar agenttiginiń tóraǵasy Qaırat Kelimbetov aıtyp berdi, dep habarlaıdy QazAqparat tilshisi.

«Memlekettik basqarý – memlekettik josparlaý júıesine jańa tásilderdi tabysty engizýdiń negizgi bóligi. Osy baǵyttaǵy transformatsııanyń negizgi qaǵıdaty «Adamǵa baǵyttalý» bolady. Jappaı tsıfrlandyrý, onyń ishinde Data Driven Government platformasyn engizý memlekettik basqarý júıesin jaqsartýdyń negizgi elementine aınalady jáne tıisinshe memlekettik josparlaý júıesiniń tabysty qyzmetin qamtamasyz etýge múmkindik beredi», - dep atap ótti Qaırat Kelimbetov Úkimettiń búgingi otyrysynda.

Spıker 29 qańtarda Prezıdenttiń Qazaqstan Respýblıkasynda memlekettik basqarýdy damytýdyń 2030 jylǵa deıingi tujyrymdamasyn maquldaǵanyn, ony 2021 jylǵy 10 aqpanǵa deıin qol qoıýǵa engizý josparlanǵanyn atap ótti.

Tujyrymdamaǵa sáıkes, memlekettik saıasatty qalyptastyrý jáne iske asyrý kezinde memlekettik apparat pen memlekettik qyzmetshiler memlekettik basqarýdyń 5 irgeli qaǵıdatyn basshylyqqa alatyn bolady.

«Bizdiń memleketimiz halyq únine qulaq asatyn, qoǵamǵa esep beretin, kásibı jáne pragmatıkalyq bolýy tıis. Memlekettik basqarýdyń servıstik modeline kóshý úshin memlekettik apparattyń aldyna 9 negizgi mindet qoıyldy. Sonymen birge, memlekettik basqarý tujyrymdamasyn iske asyrý aýqymdy jumysty talap etedi. Osyǵan baılanysty, Asqar Uzaqbaıuly (Úkimet basshysy Asqar Mamın – avt.), Ulttyq ekonomıka mınıstrligine múddeli memlekettik organdarmen birlesip, osy Tujyrymdamany iske asyrý josparyn 1 naýryzǵa deıin ázirleýdi tapsyrǵan jón dep sanaımyz», - dedi Q. Kelimbetov.