Qazaqstanda memlekettik aýdıttiń tutastaı júıesi engiziletin bolady
ASTANA. QazAqparat - Búgin Májilistiń jalpy otyrysynda palata depýtattary «Memlekettik aýdıt jáne qarjylyq baqylaý týraly» zań jobasyn birinshi oqylymda maquldady. Qujat Elbasynyń «100 naqty qadam» Ult josparyndaǵy tapsyrmalaryn iske asyrýǵa baǵyttalady.
«Qujattyń negizgi maqsaty qarjylyq baqylaýdyń quqyqtyq qoldaný tájirıbesin eskere otyryp, memlekettik aýdıttiń keshendi júıesin qurý bolyp tabylady. Jobany ázirleý barysynda Ekonomıkalyq yntymaqtastyq jáne damý uıymynyń múshe memleketteriniń tájirıbesi taldandy. Tutastaı alǵanda zań jobasy arqyly Qazaqstan halyqaralyq kásibı aýdıt standarttaryn engizetin bolady», - dedi Qarjy mınıstri Baqyt Sultanov. Onyń aıtýynsha, memlekettik aýdıt túrleri boıynsha tıimdilik aýdıtine, qarjylyq eseptilik aýdıtine jáne sáıkestik aýdıtine bólinedi. Onyń ishinde memlekettik aýdıttyń ózi syrtqy jáne ishki aýdıtke bólinedi. Sonymen qatar, zań jobasyn qabyldaý memlekettik aýdıtorlarǵa qoıylatyn biliktilik talaptaryna, sondaı-aq olardyń táýelsizdigine kepildik beredi.
