Qazaqstanda memlekettik aýdıt halyqaralyq standarttarǵa kóshedi
ASTANA. QazAqparat - Búgin Parlament Senatynyń jalpy otyrysynda «Memlekettik aýdıt jáne qarjylyq baqylaý týraly» QR Zańy qabyldandy. Qujat Elbasynyń «100 naqty qadam» Ult josparyndaǵy tapsyrmalaryn iske asyrýǵa baǵyttalady.
Máselen, Ult josparynyń «Aýdıttiń jańa júıesin engizý jáne memlekettik apparattyń jumysyn baǵalaý» atty 93-shi qadamyna sáıkes aýdıt júıesin jańǵyrtý «Esep komıteti birinshi synypty álemdik aýdıtorlyq kompanııalar úlgisimen jumys isteıtin bolady jáne aǵymdaǵy operatsııalyq baqylaýdan shyǵarylýyn» kózdeıdi. Osyǵan oraı, qabyldanǵan zańnyń erejeleri aýdıtti halyqaralyq standarttarǵa kóshirýdi qarastyrady.
Budan bólek, zań jobasynyń basty maqsaty - qarjylyq baqylaýdyń quqyqtyq qoldaný tájirıbesin eskere otyryp, memlekettik aýdıttiń keshendi júıesin qurý. Jobany ázirleý barysynda Ekonomıkalyq yntymaqtastyq jáne damý uıymynyń múshe memleketteriniń tájirıbesi taldandy. Tutastaı alǵanda zań jobasy arqyly Qazaqstan halyqaralyq kásibı aýdıt standarttaryn engizetin bolady.
Sonymen qatar, memlekettik aýdıt túrleri boıynsha tıimdilik aýdıtine, qarjylyq eseptilik aýdıtine jáne sáıkestik aýdıtine bólinedi. Onyń ishinde memlekettik aýdıttyń ózi syrtqy jáne ishki aýdıtke bólinedi. Tutastaı alǵanda, zańdy qabyldaý memlekettik aýdıtorlarǵa qoıylatyn biliktilik talaptaryna, sondaı-aq olardyń táýelsizdigine kepildik beredi.
Sonymen qatar, qabyldanǵan zań Respýblıkalyq bıýdjettiń atqarylýyn baqylaý jónindegi esep komıtetiniń ókilettigin keńeıtedi. Atap aıtqanda, Esep komıteti respýblıkalyq bıýdjet jobasyn aldyn ala baǵalaý, jınaqtalǵan qarjylyq esep berýdiń (respýblıka deńgeıinde) jyl saıynǵy aýdıtin iske asyrý, memlekettik qaryzdy qalyptastyrý jáne basqarý, elimizdiń Ulttyq Bankiniń aýdıti sekildi jańa mindetterge ıe bolady. Esep komıtetine sondaı-aq qarjy-ekonomıka salasyndaǵy ulttyq qaýipsizdikti anyqtaý, taldaý, baǵalaý jáne boljaý jónindegi ókilettikter de beriledi.
Sondaı-aq depýtattar «Qazaqstan Respýblıkasynyń keıbir zańnamalyq aktilerine memlekettik aýdıt jáne qarjylyq baqylaý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady. Qujat memlekettik bıýdjet qarjysyn paıdalaný barysynda ákimshilik quqyq buzýshylyq oryn alǵan jaǵdaıda memlekettik aýdıt jáne qarjylyq baqylaý organdaryna áreket etý salasyna ókilettikter beredi. Sonymen birge, Parlamentte Esep komıtetiniń quqyqtaryn júzege asyrýǵa baǵyttalǵan erejeler belgilenedi.
