Qazaqstanda memqyzmetshiler áleýmettik jelidegi akkaýnttary jóninde esep berýge mindetteledi me
ASTANA. QazAqparat - Qazaqstanda da Reseıdegideı memlekettik qyzmetshilerge áleýmettik jelilerdegi akkaýnttary jónindegi esep berý mindettele me?
Bul saýalǵa búgin Parlament Májilisiniń jalpy otyrysynan keıin palatanyń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev jaýap berdi, dep habarlaıdy QazAqparat tilshisi.
«Ondaı zańdy biz qarastyryp jatqan joqpyz. Qaýipsizdik jáne basqa maqsatta da onda zań qazir bizde joq. Ondaı máseleni kótergen emespiz. Meniń jeke oıymsha, qazirgi aqparat zamanynda ondaı sharaǵa barý kerek pe, kerek emes pe, tıimdiligi, paıdasy bola ma degenniń ózi úlken másele ǵoı», - dedi Áshimbaev BAQ ókilderiniń saýalyna oraı.
Aıta keteıik, búgin QazAqparat «Izvestııa» gazetine silteme jasaı otyryp, reseılik sheneýnikter jumys berýshilerge áleýmettik jelilerdegi ózderiniń akkaýnttary, blogtary men forýmdary jóninde aıtyp otyrýǵa mindetteletindigin habarlaǵan bolatyn.
«Memlekettik azamattyq qyzmet laýazymdaryna ornalasýǵa úmitti Reseı azamattarynyń ınternet jelisindegi saıttardyń meken jaılary nemese saıttardyń paraqshalary týraly málimetterdi usynyp otyrý mindetteri aıqyndalýda», - dep keltirgen edi Eńbek mınıstrligi ókiliniń sózderin «Izvestııa» basylymy.
