Qazaqstanda melodrama, detektıv, horror janrlary damysa deımiz – Qobylandy Bolat

ASTANA. KAZINFORM – Búgin Elordada Comic Con Astana-2025 – TMD men Ortalyq Azııadaǵy eń iri pop-mádenıet festıvali bastaldy.

Sharada komıks, kıno, oıyn jáne pop-mádenıet súıer qaýym bas qosady. Basqosýda qonaq bolǵan belgili akter Qobylandy Bolat Qazaqstandaǵy kınoındýstrııanyń damýy týraly pikir bildirdi.

- Meniń oıymsha qazirgi tańdaǵy qazaq kınoındýstrııasy jaqsy damyp kele jatyr. Rejısser, prodıýser, stsenarıst, akterlar bolsyn árkim óz departamentinde jan-jaqty damyp jatyr. Sheteldegiler de kóptep qyzyǵýshylyq tanytýda. Jaqynda ǵana Netflix kelip ketti. Dese de, Qazaqstanda medodrama, detektıv, horror janryndaǵy fılmder damysa deımin. Al komedııa bizdiń elimizde jetkilikti deńgeıge kóterildi, - deıdi óner juldyzy Kazinform tilshisine bergen suhbatynda.

Akter qazaq tildi dýblıaj salasyn damytýǵa basa nazar aýdarý kerektigin jetkizdi.

- Men anaý aıtarlyq kásibı dýblıaj aktery emespin. Biraq biz qolymyzdan kelgenshe barymyzdy salýǵa tyrysyp jatyrmyz. Bizdiń elimizde Shah-Murad Ordabaevtyń rejısserlyǵymen keremet jobalar jasaldy. Ol «Moana 2», «Avatar» fılminiń 1 jáne 2-bólimderi. Jaqynda 3-bólimi shyǵady. Onda da jumys isteımiz. Maǵan bul sala óte qyzyq. Qazaq dýblıaj ındýstrııasyn barynsha damytýymyz kerek jáne qazir osy dýblıajǵa qyzyǵýshylyq tanytatyn kóptegen akterler bar. Sondyqtan bul saladaǵy barlyq áriptesterime sáttilik tileımin, - deıdi ol.

Eske sala keteıik, Qazaqstandyq «Nabat operatsııasy» men «Aǵaıyndylar» fılmi jaqynda ǵana Qytaıda ótken kınofestıvalde qytaı kórermenine kórsetiledi.