Qazaqstanda mektepterdegi negatıvti saıttarǵa zań júzinde shekteý qoıylady
ASTANA. QazAqparat - Mektepterde ınternetke, atap aıtqanda balalardyń psıhıkasyna keri áser etetin saıttarǵa shekteý qoıylady, dep habarlaıdy «QazAqparat» HAA tilshisi.
Aqparat jáne kommýnıkatsııalar mınıstri Dáýren Abaev bıyl jazda Parlament qaraýyna engizilgen zań jobasynyń normalaryn túsindirdi.
«Jalpy bilim beretin mektepter úshin talaptar engiziledi. Atap aıtqanda, balalardyń psıhologııasyna keri áser etetin pornografııalyq jáne basqa da saıttarǵa shekteý qoıylady. Biz mundaı shekteýdi ár úıge qoıa almaımyz, bul ata-analardyń jaýapkershiligine baılanysty. Alaıda, mektepterde ony jasaımyz», - dedi mınıstr Facebook-ke jarııalaǵan vıdeosynda.
Sondaı-aq, ol BAQ quqyqqa qaıshy áreketterden zardap shekken balalardyń jeke derekteri men sýretterin qoldanýyn shekteıtinin habarlady.
«Mysal retinde qarastyraıyq. Kámeletke tolmaǵan balaǵa qatysty seksýaldyq sıpattaǵy qylmys boldy delik. Dene jaraqatynan bólek, ol psıhologııalyq turǵyda uzaq em alýy kerek. Eger BAQ onyń aty-jónin, jasyn jarııalaıtyn bolsa, ol basqa qalaǵa kóship ketse de jurttyń nazaryna túsetin bolady. Bul kezde eshqandaı psıhologııalyq saýyǵý múmkin bolmaıdy», - dep atap ótti ol.
