Qazaqstanda «Mektepke jol» qaıyrymdylyq aktsııasy bastaldy
ASTANA. QazAqparat- «Mektepke jol» qaıyrymdylyq aktsııasy respýblıka boıynsha 2018 jyldyń 1 tamyzy men 30 qyrkúıek aralyǵynda ótkiziledi, dep habarlaıdy QazAqparat tilshisi.
QR Bilim jáne ǵylym mınıstrliginiń «Mektepke jol» áleýmettik bastamasy az qamtylǵan jáne kóp balaly otbasylardyń, jetim jáne ata-ana qamqorlyǵynsyz qalǵan balalardyń jańa oqý jylyna daıyndalýyna kómek kórsetý maqsatynda jyl saıyn uıymdastyrylady.
«Osyǵan deıin ótkizilgen 10 jyl ishinde aktsııada 3 mln-ǵa jýyq balaǵa jalpy somasy 18 mlrd teńge shamasynda materıaldyq qoldaý kóresetildi. Atap aıtsaq, ótken jyly atalǵan aktsııa aıasynda 316 myń balaǵa mektepke daıyndyq kómegi kórsetildi. Demeýshiler men metsenattar jalpy somasy 7,9 mlrd teńgeden astam kómek pen qoldaý kórsetti. Memlekettik organdar, ulttyq kompanııalar men aktsıonerlik qoǵamdar jyl saıyn aktsııaǵa belsene qatysady», - dedi QR BǴM Balalar quqyqtaryn qorǵaý komıtetiniń tóraǵasy Nurbek Orshýbekov.
QR BǴM elimizdiń barlyq azamattaryna, bıznesmenderge, kásipkerlerge, metsenattarǵa atalǵan aktsııaǵa qosylýǵa jáne ómirlik qıyn jaǵdaıǵa tap bolǵan balalarǵa, otbasylarǵa kómek kórsetýge shaqyrady.
Sonymen qatar komıtet tóraǵasy materıaldyq qoldaý eń kóp kórsetilgen aımaqtar retinde Almaty, ShQO, Qaraǵandy, Jambyl oblystaryn atap ótti.
«Mektepke jol» aktsııasyna qatysýǵa tilek bildirýshiler Balalar quqyqtaryn qorǵaý komıtetiniń telefonyna - 8 (7172) 74-21-40, sondaı-aq Astana, Almaty, Shymkent qalalarynyń bilim basqarmasyna habarlasýyna bolady.
