Qazaqstanda mektepke deıingi bilim berýde 330 quzyrettilik ortalyǵy jumys isteıdi

ASTANA. KAZINFORM – 2023 jyldan bastap mektepke deıingi uıymdarda «Quzyrettilik ortalyqtary» pılottyq jobasy iske qosyldy. Bul ortalyqtar ozyq pedagogıkalyq tájirıbeni engizý, tárbıeshilerdiń biliktiligin arttyrý jáne ata-analar, pedagogtar men mektepke deıingi uıymdar arasyndaǵy yntymaqtastyqty nyǵaıtý alańyna aınaldy, dep habarlaıdy Oqý-aǵartý mınıstrligi.

Qazirgi tańda Qazaqstanda 330 quzyrettilik ortalyǵy jumys isteıdi, onyń 180-i qalalarda, 150-i aýyldyq jerlerde ornalasqan.

Mektepke deıingi jáne orta bilim berý baǵdarlamalaryn úılestirý maqsatynda 202 quzyrettilik ortalyǵy tirek mektepke deıingi uıymdar mártebesine aýystyrylyp, tirek mektepterge bekitildi. Balabaqshalar, keńes berý pýnktteri jáne mektepter arasyndaǵy ózara is-qımyldyń qadamdyq jospary ázirlenip, bul balalardyń oqý jáne tárbıeleý protsesinde sabaqtastyqty qamtamasyz etýge múmkindik berip otyr.

Quzyrettilik ortalyqtary balalardyń qyzyǵýshylyqtaryn eskere otyryp, transformatsııalanatyn pándik-damytý ortasyn jasaıdy, bilim berý protsesin oıyn túrinde uıymdastyrady jáne tirek mekteptermen tıimdi ózara is-qımyl ornatady.

«Quzyrettilik ortalyqtary jelisin damytý – mektepke deıingi bilim berýdi jańǵyrtýdyń mańyzdy qadamy. Bul balalarǵa sapaly, ıkemdi jáne zamanaýı mektepke daıarlyqty qamtamasyz etýge, al pedagogtarǵa – jańa bilim alyp, úzdik tájirıbelermen bólisýge múmkindik beredi», – dedi Mektepke deıingi bilim berý departamentiniń dırektory Manara Adamova.

Aıta keteıik, bıyl elimizde 172 mektepke deıingi uıym ashyldy.