Qazaqstanda mektepke deıingi jáne orta bilim júıesi jetildirilýde
ASTANA. 31 qańtar. QazAqparat - «Balapan» baǵdarlamasynyń aıasynda 2011 jyly mektepke deıingi mekemeler jelisi 1650 birlikke artty (487 balabaqsha, 1163 shaǵyn ortalyq),
dep habarlady QR Bilim jáne ǵylym mınıstrliginen Pm.kz saıtyna.
Sondaı-aq jekemenshik balabaqshalar jelisi 152 birlike nemese 43,8 paıyzǵa ulǵaıyp, 2012 jyly olardyń sany 499 birlikti qurady. Qazirgi tańda respýblıkada mektepke deıingi 8096 mekeme jumys isteıdi (onyń ishinde, 2748 balabaqsha, 5348 shaǵyn ortalyq) jáne olar 587,8 myń balany mektepke deıingi tárbıemen qamtyp otyr.
Oǵan qosa, respýblıkada jalpy bilim beretin 7696 mektep jumys isteıdi jáne olarda 286 370 pedagog eńbek etedi. Sondaı-aq Astana, Semeı, Kókshetaý, Taldyqorǵan, Óskemen qalalarynda 6 Zııatkerlik mektep jumys isteıdi.
Bilim jáne ǵylym mınıstrliginiń málimeti boıynsha, 12 jyldyq oqý júıesine aýysý úshin qazir elimizde ázirlik jumystary qolǵa alynǵan. Respýblıkanyń 104 mektebinde, onyń ishinde 45 aýyldyq, 59 qalalyq mektepte 12 jyldyq bilim júıesine aýysý jónindegi tájirıbelik jumystar júrgizilýde.
Elimizde pedagog mamandyǵyn, úzdik muǵalimderdiń tájirıbeleri men jetistikterin keńinen nasıhattaý jumystary júrgizilýde. Atap aıtqanda, 2011 jyly matematıka muǵalimderiniń І sezi, ınformatıka muǵalimderiniń «Altyn dısk» konkýrsy, «Daryndy muǵalim - daryndy balalarǵa» VI respýblıkalyq olımpıadasy, «Otbasy, mektep, qoǵam - bolashaqtyń ıgiligi úshin» respýblıkalyq pedagogıkalyq forýmy, t.b. sharalar ótti. Jáne Nazarbaev Zııatkerlik mektepteriniń jandarynan Pedagogıkalyq sheberlik ortalyqtary, sondaı-aq Pedagogtardyń biliktilikterin jetildirýdiń ulttyq ortalyqtary sııaqty jańa qurylymdar ashylyp otyr,- delingen vedomstvo aqparatynda.
Elimizde sondaı-aq daryndy balalarǵa arnalǵan 115 bilim oshaǵy bar. 2011 jyly Qazaqstannyń oqýshylary halyqaralyq olımpıadalar men jarystardan 933 medal oljalap qaıtty, olardyń ishinde 253 altyn, 332 kúmis, 348 qola júlde, 45 gramota bar.
