Qazaqstanda mektepke deıingi mekemelerdiń tárbıelenýshilerine arnalǵan ekologııalyq oqý quraly ázirlenýde
ASTANA. QazAqparat - Álııa Nazarbaevanyń «Jandaný» ekologııalyq jobasy aıasynda Qazaqstandaǵy mektepke deıingi mekemelerdiń tárbıelenýshilerine arnalǵan «Balalyqtyń meıirimdi ǵalamshary» atty ekologııalyq oqýlyq ázirlenýde. Bul týraly búgin Ortalyq kommýnıkatsııalar qyzmetinde «Jandaný» ekologııalyq jobasy aıasynda 12 jyldyq mektepterge arnap jaryq kórgen oqýlyqtyń tusaýkeser rásiminde joba ókili Murat Isahanov málim etti.
«Jandaný» jobasy - júıeli túrde júrgiziletin jumys. Onda biz bilim berý júıesiniń barlyq satylaryn, mektepke deıingi bilim men joǵary bilimge deıin qamtımyz. Mektepke deıingi júıe úshin bizdiń joba «Balalyqtyń meıirimdi ǵalamshary» atty oqý quralyn ázirleýde. Onda kishkentaı búldirshinder ózderiniń eń alǵashqy talyn egýdi úırenip, ómirdi jarqyn ete túsýge úırenetin bolady», - dedi M.Isahanov.
Onyń aıtýynsha, «Jandaný» jobasy orta jáne joǵary synyp oqýshylary úshin ekologııalyq tárbıe beretin oqý quraldaryn jasap qoıǵan. «Orta jáne joǵary synyp oqýshylary úshin biz eki jyl boıy «Ekologııalyq mádenıet» kýrsyn ázirledik. Biz ony Aqtaý, Pavlodar, Almaty jáne Qaraǵandy qalalarynda aprobatsııaladyq. Bizdiń elimizdegi túrli oblystardy alý sebebimiz, ár jerdiń tabıǵatqa degen kózqarastaryn salastyrý boldy. Osy tusta biz fakýltatıvtik kýrstyń aprobatsııasyn sátti aıaqtadyq. Qazir ol Almatydaǵy 48 mektep-lıtseıdiń bazasynda júzege asyrylyp jatyr. Búginnen bastap Astana qalasynyń bilim basqarmasy men mektepteri bizdiń kýrsymyzdy ózderiniń josarlaryna engizedi dep úmittenemiz», - dedi M. Isahanov.
Aıta keteıik, «Jandaný» jobasy sonymen qatar ekologııalyq mádenıet boıynsha joǵary oqý oryndaryna arnalǵan lektsııalar kýrsyn da ázirlegen. Ol bıyl sáýir aıynda Almatyda ótken jastar forýmynda tanystyrylǵan bolatyn.
