Qazaqstanda mektepke deıingi bilimmen qamtý 95,2% quraıdy – Baýyrjan Baıbek
Partııanyń baspasóz qyzmetinen málim etkendeı, keńes músheleri byltyr elimizdiń 200 eldi mekenin aralap, 1300-den astam bilim berý, áleýmettik qorǵaý jáne densaýlyq saqtaý mekemeleriniń jumysyn tekserip shyqty. Óńirlerdegi tekserý jumystarynyń nátıjeleri partııalyq tyńdaýda talqylandy. Jıynda «Nur Otan» partııasy Tóraǵasynyń birinshi orynbasary Baýyrjan Baıbek otbasyn qoldaý jáne balalar quqyn qorǵaý partııanyń udaıy nazarynda bolatynyn alǵa tartty.
«Bul baǵyttaǵy jumystar elimizde táýelsizdik alǵannan bastap júrgizilip keledi. Elimizdiń Tuńǵysh Prezıdenti - Elbasy Nursultan Nazarbaev 1994 jyly Birikken Ulttar Uıymynyń Bala quqyqtary týraly Konventsııasyna qol qoıdy. Konventsııany iske asyrý birneshe urpaq ómirindegi oń ózgeristerge yqpal etti. Nátıjesinde, balalar ólimi bes eseden astam tómendedi. Bilim berýmen, sonyń ishinde mektepke deıingi bilimmen qamtý sońǵy 5 jylda 13,6% ulǵaıyp, 95,2% qurady. Inklıýzıvti bilim berý damýda, balalar úılerindegi jetim jáne ata-anasynyń qamqorlyǵynsyz qalǵan balalardyń sany sońǵy 10 jylda 2 eseden astam azaıdy, áleýmettik qorǵaý júıesi qalyptasty. Elimizde balalardyń quqyqtaryn iske asyrý úshin quqyqtyq baza quryldy, ony jetildirý jalǵasyn tabýda», - dedi Baýyrjan Baıbek.
Sonymen birge Baýyrjan Baıbek 2013 jyly iske qosylǵan «Baqytty otbasy» partııalyq jobasynyń eldik iske aınalǵanyn atap ótti.
Otbasy, áıelder máseleleri jáne balalardyń quqyqtaryn qorǵaý jónindegi respýblıkalyq qoǵamdyq keńesi óńirlerge júrgizgen monıtorıng qorytyndysy boıynsha birqatar máseleler anyqtaldy. Bul rette, partııanyń óńirlik memlekettik organdarmen jáne BǴM-men 2 aıda jedel jumys júrgizýiniń arqasynda anyqtalǵan keleńsizdikterdiń 70% joıyldy. Osy baǵyttaǵy jumystar jalǵasyp, partııanyń udaıy baqylaýynda bolady. Baýyrjan Baıbek osy jumystar QR Prezıdenti Qasym-Jomart Toqaev usynǵan «halyq únine qulaq asatyn memleket» tujyrymdamasyna sáıkes qoǵamdyq júıeli monıtorıng júrgizý men memleket pen azamattar arasyndaǵy dıalogtyń jańa formatyn ornatý ekendigin aıtty.
Eske sala keteıik, Otbasy, áıelder máseleleri jáne balalardyń quqyqtaryn qorǵaý jónindegi respýblıkalyq qoǵamdyq keńes «Baqytty otbasy» jobasynyń aıasynda ótken jyldyń aqpan aıynda quryldy. «Baqytty otbasy» ulttyq jobasy QR Tuńǵysh Prezıdenti-«Nur Otan» partııasynyń Tóraǵasy Nursultan Nazarbaevtyń tapsyrmasy boıynsha qolǵa alyndy. Joba aıasynda balalar úıiniń 1 myńnan asa túlegi turǵyn úımen qamtamasyz etildi, 2000 jetim balaǵa bilim berý jınaqtaý salymy ashyldy, qıyn-qystaý jaǵdaıdaǵy 270 myńǵa jýyq otbasyǵa quqyqtyq, psıhologııalyq kómek kórsetildi.
