Qazaqstanda mektepke deıingi bilim balalardyń barlyǵyna qoljetimdi emes
ASTANA. QazAqparat - Mektepke deıingi bilim alý quqyǵy - balanyń basty quqyqtarynyń biri, alaıda Qazaqstandaǵy balalardyń besten biri oǵan qol jetkize almaı keledi. Bul jaıly Sandj Zertteý ortalyǵynyń sarapshylary málimdedi, dep habarlaıdy QazAqparat.
Ortalyqtyń sarapshylary 2017 jyly «QR-da bala quqyqtaryn qorǵaý salasyndaǵy jaǵdaıdy táýelsiz monıtorıngileý jáne taldaý» atty zertteý júrgizdi.
Shalǵaı aýyldarda ata-analardyń 59%-i balabaqsha jetispeýshiligin aıtyp shaǵymdanady. Olardyń sózine qaraǵanda, balasy bar úıdiń materıaldyq jaǵdaıy mektepke deıingi bilim mekemesine barýyna qatty áser etedi. Ondaı qyzmetke qoly jetpeıtinin aıtqan ata-analardyń 57%-iniń materıaldyq jaǵdaıy nashar.
Bul jaıtqa ata-analar narazy. Olardyń 40%-ten astamy balasynyń quqyǵy tolyq saqtalmaı jatqanyn, al keıbir ata-analar múldem saqtalmaıtynyn aıtyp shaǵymdanady. Eldi mekenderdegi úıirmeler men sport sektsııalarynyń azdyǵynan balalardyń teledıdar men ınternetke táýeldi bolýy ata-analardy alańdatyp otyr. Balalar arasynda saýalnama júrgizilgende, olardyń 37%-i túrli úıirmelerge baratyny belgili boldy.
Zertteý QR Din isteri jáne azamattyq qoǵam mınıstrliginiń qoldaýymen Azamattyq bastamalardy qoldaý ortalyǵynyń memlekettik granty aıasynda júrgizildi.
