Qazaqstanda mektep túlekteri sońǵy qońyraýǵa qansha teńge jumsaıdy

Sońǵy qońyraý – mektep túlekteri úshin mańyzdy is-shara. Bir synypta oqyp, teń ósken balalar bir-birimen qoshtasady, estelik fotoǵa túsedi. Túlekter albomyna túsý úshin olar aldyn ala daıyndalyp, birdeı lenta jasatady, keıde qyzdar fartýk tiktiredi.

Elimiz boıynsha Qostanaı qalasynda sońǵy qońyraýǵa arnalǵan atrıbýttardyń baǵasy tómen. Túlekter albomynyń baǵasy shamamen 2 000 teńgeden (eki betten turady ári qaǵazy qalyń emes) bastalady. Fotosessııa jasap, daıyn úlgini tańdasa albom baǵasy 6 000 – 10 000 teńge aralyǵynda. Al jańa ıdeıa men tyń usynystardyń baǵasy 15 000 teńgeden bastalady. Túlekter lentasynyń qarapaıym úlgisiniń baǵasy 650 – 1 000 teńge bolsa, aty-jóni jazylǵan nemese tyǵyz matadan jasalǵan nusqalarynyń quny 1000–2500 teńge aralyǵynda. Qazirgi kezde túrli taspen kómkerip, jyltyr áser beretinin de jasatýǵa bolady. Bul lenta baǵasy – 4 500–4 800 teńge. Qyzdar úshin faktýktiń ortasha baǵasy – 4 000 – 8 000 teńge.

Petropavldaǵy fotosalondar bir bettik túlekter albomyn, ıaǵnı planshet tárizdi estelik fotony 2 000 – 4 000 teńgege jasap beredi. Al eki bekttik albom baǵasy orta eseppen – 7 000 teńge. Birneshe betten turatyn fotokitap baǵasy 10 000 teńgeden bastalyp, 20 000 teńgege jetedi. Baǵa qaǵaz túrine, dızaınyna qaraı ósip, ózgere beredi. Lenta baǵasy 1 000 – 2 000 teńge bolsa, eń arzan fartýk baǵasy 4 000 – 6 000 teńge. Eger «forma + fartýk» jıyntyǵyn jeke tiktirse baǵasy 15 000 teńgeden joǵary bolady.

Oralda túlekterge arnalǵan jıyntyq baǵasy formaty men sapasyna baılanysty ózgerip otyrady. Túlekter albomynyń baǵasy 3 000 – 5 500 teńgeden bastalyp, keıde 7 500 – 10 500 teńgege deıin jetedi. Qarapaıym atlas lentalardy 500 – 1 000 teńgege, al tyǵyz matadan jasalyp, aty-jóni jazylǵanyn 1 000 – 1 500 teńge satyp alady. Ortasha baǵa — 700 – 1 200 teńge. Mektep fartýginiń qarapaıym úlgisi 3 000 – 6 000 teńge, al sapaly ári sándi úlgisi 6 000 – 10 000 teńge aralyǵynda.

Aqtóbede túlekter albomynyń qarapaıym túri shamamen 4 000 – 6 000 teńge, al birneshe betten tursa jáne fototúsirilim jasasa 10 000 – 20 000 teńgege deıin jetedi. Lentalardyń baǵasy — 1350–1850 teńge. Fartýk tiktirý quny 5000 teńgeden bastalady.

Túrkistanda túlekter albomynyń baǵasy ártúrli. Formaty men mazmunyna qaraı quny – 4 000 – 25 000 teńge aralyǵynda. Bul qalada lentany 500–700 teńgege satyp alýǵa bolady. Al faktýk quny – 8 500 – 15 000 teńge aralyǵynda.

Tarazda sońǵy qońyraýǵa arnalǵan jıyntyq baǵasy tańdaýǵa qaraı túzildi.
Túlekter albomynyń qarapaıym túri (eki betten nemese 10 shaqty betten turady, úsh kıim aýystyp fotoǵa túsedi) 4 500 – 6 000 teńgeden bastalady. Ortasha baǵasy — 4000 – 10 000 teńge. Eger albomǵa tapsyrys bergen oqýshy sany 15-ten assa, muǵalimge tegin usynylady. Fotosessııa, mobılograf, rekvızıt jáne qatty muqabasy bar qymbat albom toptamasynyń baǵasy – 10 000 – 20 000 teńge. Lentalardyń baǵasy shamamen 2 000 teńge bolsa, qońyraý tigip, taspen bezendirilgeni 2 400 teńge bolady. Bant nemese kóbelek galstýk taqsa 4 000 – 4 500 teńge qajet. Qarapaıym matadan tikse baǵasy – 3 500 – 4 000 teńge. Qyzdar fartýkty 3 000 teńgege satyp alady. Onyń qymbaty 10 000 teńge bolyp tur. Ortasha baǵa — 6 000 – 8 000 teńge. Tigin sheberhanasyna synyp bop tapsyrys berse, arzanǵa shyǵady.

Kókshetaýda da sońǵy qońyraýǵa daıyndyq baǵasy salystyrmaly túrde arzan bolýy múmkin. Degenmen munda da baǵa tańdaýǵa baılanysty túrlenip otyrady. Eki bettik túlekter albomynyń baǵasy 5 000 teńgeden bastalsa, muqabasy qalyń ári úsh ret ashylatyn albom úshin 6 500 teńge jáne odan kóp aqsha tóleıdi. Sonymen birge muqabasy men onyń sapasyna qaraı bir ret ashylatyn nusqasynyń baǵasy 10 500 teńge, eki jáne odan da bettik albom baǵasy 12 500 – 18 000 teńge. Lentalardyń baǵasy da tapsyrys kólemine qaraı ózgeredi. Eger birer danasyn ǵana jasatsa 1 500 teńge bolady. Al 3–9 danasyn 1200 teńgege, 10 jáne odan da kóp bolsa árbireýin 850 teńgege satyp alýǵa bolady. Fartýk baǵasy 3 000 – 5 000 teńge, qyzdar formany qosa satyp alsa 10 000 teńge bolady.

Taldyqorǵanda túlekter albomynyń baǵasy bettiń sanyna qaraı 5 000 – 13 000 teńge aralyǵynda. Lenta quny 380–700 teńge, al esimi jazylsa árip sany men materıalyna baılanysty baǵasy qymbat. Fartýk baǵasy 6 000 teńgeden bastalyp, 12 000 – 15 000 teńgege deıin jetedi. Forma men fartýkty birge satyp alsa baǵa odan da joǵary bolady.

Óskemen men Semeıde túlekter albomynyń baǵasy orta eseppen 5 000 – 15 000 teńge. Eki bettik albom 6 000 – 7 000 teńge bolsa, úsh bettik albom baǵasy 7 000 – 8 000 teńge. Lentalar baǵasy 2 000 – 4 000 teńge, al fartýk baǵasy 6 000 teńge jáne odan joǵary.

Aqtaý qalasynda baǵalar arasynda úlken aıyrmashylyq bar. Fotoalbom baǵasy 5 000 – 20 000 teńge aralyǵynda. Lentalar quny shamamen 2 000 – 3 000 teńge bolsa, fartýk quny 6 000 teńgeden bastalady. Dızaıny men matasyna qaraı keıde baǵa 10 000 – 15 000 teńgege deıin jetedi.

Qonaevta eki betten turatyn albom baǵasy orta eseppen 5 000 – 7 000 teńge, úsh-tórt bettik albom quny 9 000 – 12 000 teńge. Fotokitapqa tapsyrys berse 15 000 – 20 000 teńge tóleıdi. Túlekterdiń qarapaıym ǵana lentasy 500–800 teńge satylsa, aty-jóni jazylǵan nusqasy 1 000 – 1 800 teńge. Fartýk baǵasy 5 000 – 9 000 teńge aralyǵynda. Ony tapsyryspen de tiktirýge bolady.

Shymkentte túlektiń eki bettik albomynyń baǵasy 5 400 – 7 000 teńge bolsa, úsh-tórt betten turatyn albomdy jasatý quny 9 400 – 11 000 teńge. Kitap tárizdi albomǵa tapsyrys bergen túlekter 15 000 – 18 000 teńge (maýsymdyq fotosessııa jasaıdy) shyǵyndaıdy. Synyp bolyp tapsyrys bergen kezde qarapaıym lentany 470–700 teńgege satyp alady. Aty-jóni jazylsa 950 – 1 500 teńge, moıynshalǵy tárizdisi 1 890 – 2 000 teńge, tyǵyz matadan tiktirgeni 2 500 – 3 500 teńge bolady. Fartýk baǵasy orta eseppen 5 000 – 8 000 teńge, al forma men faktýk jıyntyǵynyń baǵasy 10 000 – 20 000 teńge aralyǵynda.

Almatyda da sońǵy qońyraýǵa daıyndyq kezinde túlekter albom, lenta jáne mektep formasyna tapsyrys beredi. Eki betten turatyn albomnyń ortasha baǵasy 6 000 – 8 000 teńge, úsh-tórt bettik albom 10 000 – 14 000 teńge, al kitap tárizdi fotoalbom baǵasy 18 000–25 000 teńgege eseptelgen. Kóp betten turatyn albomǵa tapsyrys bergender maýsym saıyn fotosessııa jasaıdy. Synyp bolyp lentaǵa tapsyrys berse eń arzanyn 500-900 teńgege satyp alýǵa bolady. Al aty-jóni jazylsa 1 200 – 2 000 teńge. Moıynshalǵy tárizdi túri 2 000 – 3 000 teńge, al barqyt matadan tikkeni 3 500 – 5 000 teńge. Fartýk quny orta eseppen 6 000 – 10 000 teńge, al «forma + fartýk» jınaǵynyń quny 15 000 – 30 000 teńge.

Astanada túlekter keshine arnalǵan daıyndyq ata-analar úshin odan da qymbatqa túsedi. Eki bettik albom baǵasy orta eseppen 6 500 – 9 000 teńge, úsh-tórt bettik albom quny 11 000 – 15 000 teńge. Birneshe ret fotosessııa jasatyp, kitap tárizdi albom jasap shyqsa 20 000 – 28 000 teńge tóleıdi. Qarapaıym lentalar quny 600 – 1 000 teńge, aty-jóni jazylsa 1 500 – 2 500 teńge. Fartýk quny – 7 000 – 12 000 teńge aralyǵynda.

Qaraǵandy men Jezqazǵanda eki bettik albom baǵasy 8 000 teńgeden bastalady. Daıyn úlgide túlektiń óz fotosy, synyp oqýshylary bar. Sonymen birge top bolyp túsken fotolaryn tańdaıdy. Albom baǵasy bettiń sany men qaǵazyna qaraı qymbattaı beredi. Lentalar 500 – 1 500 teńge, al fartýk baǵasy 5 000 – 10 000 teńge aralyǵynda.

Qyzylordada albom baǵasy – 8 230 teńge (syrtqy muqabasy qatty, dızaın fotosalon usynysy aıasynda tańdalady jáne fototúsirilim bir orynda jasalady). Lentalardyń ortasha baǵasy — 500 – 1 200 teńge. Fartýk baǵasy - 3 000 – 7 000 teńge, formamen birge tańdasa 10 000 – 15 000 teńge.

Pavlodarda sońǵy qońyraýǵa daıyndyqtyń ortasha shyǵyny: albom 10 000–15 000 teńge, lenta – 2 000 – 2 600 teńge, fartýk – 6 000 – 12 000 teńge.

Atyraýda albom baǵasy shamamen – 15 000 teńge bolsa, lenta quny 990 teńgeden bastalady. Taspen kómkerip, aty-jónin de jazyp beredi. Er balalar ıyǵyna sándi shen taqsa 1 890 teńge, kishkentaı qońyraý men temir shynjyr baılasa 2 590 teńge bolady. Bant nemese galstýk jıyndyǵynyń quny – 3 690 teńge. Fartýk quny 5 000 teńgeden bastalady.

Aıta keteıik, buǵan deıin mınıstrlik bitirý keshterin bilim berý uıymdarynan tys jerlerde uıymdastyrýǵa bolmaıtynyn habarlaǵan edi.