Qazaqstanda mektep psıhologtarynyń sany artady

NUR-SULTAN. QazAqparat – Qazaqstandaǵy orta bilim berý mekemelerinde pedagog-psıholog mamandarynyń sary eselene túspek. Bul týraly QR Bilim jáne ǵylym mınıstrliginiń Balalar quqyqtaryn qorǵaý komıteti tóraǵasynyń orynbasary Dýlat Jekebaev málim etti, dep habarlaıdy QazAqparat tilshisi.

«Kún tártibindegi mańyzdy suraqtardyń biri mektepte psıhologııalyq qoldaý kórsetý qyzmetin kúsheıtý. Qazirgi tańda elimiz boıynsha mektepterde 7 myńnan astam pedagog-psıholog eńbek etip jatyr. Keıbir oqýshylar ata-anasy men muǵalimine aıtpaıtyn jaıttardy psıholog mamandarǵa jetkizip jatady. «Pedagog mártebesi» týraly zańnyń aıasynda atalǵan mamandardyń jalaqysy ósti. Sondaı-aq, bıyl mınıstrlikke qarasty Y. Altynsarın atyndaǵy Ulttyq bilim berý akademııasy janynan psıhologııalyq ortalyq ashyldy. Odan bólek, mekteptegi pedagog-psıholog mamandarynyń sanyn kóbeıtý baǵytynda jumys isteýdemiz», - dedi Dýlat Jekebaev.

Sondaı-aq, mınıstrlik ókili bilim berý oshaqtarynda jumys isteıtin psıholog mamandardyń jumys algorıtmi qaıta qaralatynyn tilge tıek etti.

Buǵan deıin Balalar quqyqtaryn qorǵaý komıtetiniń ókili Qazaqstanda balalardyń qaýipsizdigin qamtamasyz etý maqsatynda mektepterdi táýlik boıy arnaıy kúzet qyzmetiniń qadaǵalaýyna berý máselesi qaralyp jatqanyn málim etti.

Aıta keteıik, búgin elordada terrorıstik qaýip-qaterge qarsy kúres taqyrybyna arnalǵan 8-shi respýblıkalyq konferentsııa ótti.

Atalǵan sharada elimizde kúzet qyzmetimen aınalysatyn jeke uıymdarǵa lıtsenzııa qandaı talappen beriletini aıtyldy.

Odan bólek, kúzet qyzmetkerlerine qoıylatyn talap pen olardy daıarlaý jospary qaıta qaralyp jatqandyǵy habarlandy.