Qazaqstanda mektep oqýshylarynyń sabaǵy jaz aılaryna shegerilmeıdi
NUR-SULTAN. QazAqparat – Qazaqstanda mektep oqýshylaryn qashyqtan oqytýǵa daıyndyq bar. Bul týraly QR Bilim jáne ǵylym vıtse-mınıstri Sholpan Karınova onlaın brıfıngide málim etti, dep habarlaıdy QazAqparat tilshisi.
Brıfıng barysynda vıtse-mınıstr mektep oqýshylaryn jaz aılarynda oqytý usynysyna jaýap berdi.
«Tórtinshi toqsandy jazǵa qaldyrǵan elder baıqalmady. Biz bul máseleni tyńǵylyqty zerdelep, qashyqtan oqytýǵa daıyn ekenimizdi kórip otyrmyz . Almaty, Nur-Sultan qalasynyń ákimdikteri men bilim basqarmalarynyń daıyndyq jumystary óte jaqsy. Almaty qalasyna toqtasaq, 10 myńnan asa kompıýterdi oqýshylarǵa ýaqytsha paıdalanýǵa taratyp berdi», - dedi vıtse-mınıstr.
Sonymen qatar ol elordada kompıýteri joq 6,5 myń bala anyqtalǵanyn, sonyń ishinde 6,1 myń kompıýter oqýshylar men muǵalimderge taratylǵanyn, taǵy da noýtbýkter satyp alynyp jatqanyn jetkizdi.
«Sol sııaqty basqa da ákimdikterde de daıyndyq jumystaryn júrgizýde. Osy oraıda daıyndyq tıisti deńgeıde bolsa, qashyqtan oqytý ábden qoljetimdi ekenin atap ótken jón», - dedi Sholpan Karınova.
Budan buryn habarlanǵandaı, vıtse-mınıstr Ulttyq biryńǵaı testileý óziniń merziminde ótkiziletinin aıtty. Sonymen qatar ol mektep oqýshylaryna arnalǵan telesabaqtardyń kestesi 5 sáýirge deıingi aralyqta beriletinin jetkizdi.
