Qazaqstanda mektep oqýshylarynyń 87,7 paıyzy jyl boıy sportpen aınalysý múmkindigine ıe

Bul týraly búgin Májilistiń Áleýmettik-mádenı damý komıtetiniń keńeıtilgen otyrysynda Bilim jáne ǵylym vıtse-mınıstri Murat Ábenov málim etti. Eske salsaq, komıtet tóraıymy Darıǵa Nazarbaevanyń jetekshiligimen ótken otyrysta elimizdegi mektep oqýshylaryn buqaralyq sportqa tárbıeleý máseleleri qaralǵan bolatyn.

Vıtse-mınıstrdiń aıtýynsha, sońǵy jyldary elimizdiń oqýshylary men tárbıelenýshileri úshin mekteptegi sporttyq baza keńeıe tústi. «Máselen, respýblıkanyń jalpy bilim beretin mektepteriniń balansynda 20 myńnan astam sporttyq ǵımarat bar. Al mektep jasyndaǵy balalardyń 87,7 paıyzy sport zaldarynda jyl boıy dene shynyqtyrýmen jáne sport túrlerimen aınalysý múmkindigine ıe. Sonymen qatar, olardyń 23,7 paıyzy qysqy sport túrlerimen aınalyssa, tek 1,5 paıyzy ǵana mektep jaǵdaılaryna oraı sýda júzýmen aınalysa alady», - deıdi M. Ábenov.

Onyń sózine qaraǵanda, respýblıkanyń 1 762 mektebinde arnaıy medıtsınalyq toptar ashylǵan. Onda densaýlyǵy nashar 20 myńnan astam mektep oqýshysy sport túrlerimen aınalysady.

Budan bólek, vıtse-mınıstr mektepterdegi dene tárbıesi páni muǵalimderiniń sapalyq quramy da jaqsaryp kele jatqanyn atap ótti. «Qazir mekteptegi sporttyq tárbıe jumystaryn 19 myńnan astam dene tárbıesiniń muǵalimderi qamtamasyz etip júr», - dedi ol.