Qazaqstanda mektep medıtsınasynyń jańa standarty engiziledi
ASTANA. KAZINFORM – Qazaqstanda mektep medıtsınasyn jańǵyrtý aıasynda jańa standarttar engizilip jatyr.
Jańa standarttar oqýshylardy profılaktıkalyq tekserýden ótkizý sapasyn arttyrýǵa baǵyttalǵan. Ol medıtsınalyq tekserýlerdi tsıfrlandyrýdy, alǵashqy medıtsınalyq-sanıtarııalyq kómek uıymdaryn dıagnostıkalyq jabdyqtarmen qamtamasyz etýdi jáne orta býyn medıtsına qyzmetkerlerin oqytýdy kózdeıdi.
– Búginde profılaktıkalyq tekserýlerdi jaı ǵana ótkizý emes, olardyń joǵary sapasyn qamtamasyz etý mańyzdy. Ol úshin medıtsına qyzmetkerlerin jańa tásilderge oqytyp, olardy zamanaýı dıagnostıkalyq quraldarmen qamtamasyz etý qajet, – dedi QR Densaýlyq saqtaý mınıstrliginiń Ana men bala densaýlyǵyn saqtaý departamentiniń dırektory Maǵrıpa Embergenova.
Jalpy balalarǵa hırýrgııa, oftalmologııa, otorınolarıngologııa jáne stomatologııa baǵyttary boıynsha profılaktıkalyq tekserý júrgizýge qatysatyn 2054 meıirgerdi oqytý josparlanyp otyr.
Mınıstrlik mamandardy daıarlaý barysyna apta saıyn monıtorıng júrgizip, óńirlerdi bul baǵyttaǵy jumysty jandandyrýǵa shaqyrdy.
– Mektep oqýshylaryna sapaly profılaktıkalyq tekserýler júrgizý úshin medıtsınalyq uıymdarǵa 900-den astam jabdyq jıyntyǵy qajet bolady, – dep atap ótti vedomstvodan.
Aıta keteıik, bala damýyndaǵy kidiristerdi erte anyqtaıtyn ortalyqtar sany 386-dan asty.
