Qazaqstanda mektep kanıkýly qysqara ma

NUR-SULTAN. QazAqparat – QR Bilim jáne ǵylym mınıstri Ashat Aımaǵambetov mektep kanıkýlyn qysqartý týraly kásipker Aıdyn Rahymbaevtyń usynysyna pikir bildirdi, dep habarlaıdy QazAqparat tilshisi.

«Bul turǵyda óziniń jaqsy jáne teris jaqtary da bar. Osy oraıda narazylyq bildirgenderdiń de ýájin túsinip otyrmyz. Sondyqtan bul máselede únemi ǵylymı qadamdarǵa súıený kerek. Tek mınıstrliktiń nemese bilim berý basqarmasynyń, muǵalimniń nemese ata-ananyń kózqarasyna ǵana qaraýǵa bolmaıdy», - dedi A. Aımaǵambetov Májiliste tilshiler saýalyna jaýap bere otyryp.

Onyń sózine qaraǵanda, atalǵan usynysqa qatysty bárinen buryn bilim berý tıimdiligi nazarǵa alynýy kerek.

«Biz aldymen ǵylymı turǵydan qaraýymyz kerek, ıaǵnı bala úshin onyń tıimdiligi qalaı bolatynyn eskergen mańyzdy. Eger balanyń ózine qatysty, bolashaǵy men tıimdiligine qaraıtyn bolsaq, bul rette basqa da qadamdardy zerdeleý qajet. Bul máseleni ǵylymı, psıhologııa, ádisnama turǵysynan nazarǵa alsaq, biz qazir zertteý jumystaryn júrgizip jatyrmyz. Osynyń nátıjesin qoǵamǵa jarııalaımyz. Oǵan deıin bul máseleni áriptestermen egjeı-tegjeıli talqylaımyz. Atalǵan taqyryp kabınette ǵana talqylanbaıdy», - dedi mınıstr.

Eske sala keteıik, buǵan deıin belgili kásipker Aıdyn Rahymbaev Qazaqstanda mektep kanıkýlyn qysqartýdy jáne osynyń esebinen oqý jylyn uzartýdy usyndy.