Qazaqstanda mekenjaı anyqtamasy naqty qashan joıylady

NUR-SULTAN. QazAqparat – «Azamattarǵa arnalǵan úkimet» memlekettik korporatsııa basqarmasynyń tóraǵasy Ásemgúl Baltasheva elimizde mekenjaı anyqtamasy naqty qashan joıylatynyn málim etti, dep habarlaıdy QazAqparat tilshisi.

Elordada «Tsıfrlyq kúz» sharasynda Ásemgúl Baltasheva Qazaqstanda qazirgi tańda aptasyna 6 kún qyzmet etetin 348 halyqqa qyzmet kórsetý ortalyǵy baryn atap ótti. Ortalyqtaǵy mamandardan eń kóp suralatyn qyzmet - mekenjaı anyqtamasy ekeni habarlanyp otyr.

«1 qarashadan bastap mekenjaı anyqtamasyn alyp tastaımyz. Bizdiń elimizdiń azamattary osyǵan deıin 10 mln ret osy anyqtamany alý úshin HKO-larǵa kelgen. Qazirgi ýaqytta atalmysh anyqtamany alýdyń qajeti joq. Sebebi, bizdiń tehnıkalyq qyzmetkerler óte aýqymdy jumysty atqaryp, barlyq júıeni úılestirdi», - dedi Ásemgúl Baltasheva.

ıAǵnı, 1 qarashadan bastap azamattar mekenjaıynyń qaıda ekenin egov.kz portalynan bile alady.

Eske sala ketsek, Іshki ister mınıstrligi Qazaqstanda mekenjaı anyqtamasy joıylatynyn buǵan deıin habarlaǵan bolatyn.

«Azamattardy tirkeý týraly málimetterdi berý eń suranysqa ıe memlekettik qyzmetterdiń biri bolyp sanalady. Jyl saıyn halyq qujattardy, jeńildikterdi, járdemaqylardy jáne basqa da qyzmetterdi alý úshin memlekettik organdar men uıymdarǵa 10 mıllıonnan astam mekenjaı anyqtamasyn suratady. Azamattar jumysqa, mektepterge, balabaqshalarǵa, emhanalarǵa, bankterge jáne taǵy basqa jerlerge ornalasý kezinde únemi HQKO-na, memlekettik organdarǵa júginýge májbúr bolady, kezekte kóp ýaqytyn joǵaltady», - dep habarlady ІІM-nen.