Qazaqstanda medrese shákirtteri arasyndaǵy tuńǵysh respýblıkalyq olımpıada bastaldy
ASTANA. QazAqparat - Búgin Qazaqstan musylmandary Dinı basqarmasynyń uıymdastyrýymen Almatydaǵy «Nur Múbarak» Egıpet Islam Mádenıeti ýnıversıtetinde tuńǵysh ret medrese shákirtteri arasynda respýblıkalyq olımpıada bastaldy.
Bilim saıysynyń ashylý saltanatyna Bas múftı Erjan qajy Malǵajyuly qatysty, dep habarlaıdy QMDB baspasóz qyzmetinen.
«Islam - bilim men ǵylym dini. Dinı basqarma shákirtterimizdiń bilimine asa mán berip otyr. Búgingi ilim saıysyn ótkizýdegi maqsatymyz - sizderdiń bilimderińizdi jan-jaqty shyńdaý. HHІ ǵasyr ımamyna qoıylar talap zor. Sondyqtan din ókilderi zaman talabyna saı bolýy tıis. Tek dinı salamen ǵana shektelip qalmaı, ózge ǵylymdardy da úırenýimiz kerek. Qurmetti shákirtter, ilim saıysyna qosh kelipsizder. Sizderge sáttilik tileımin! Alla taǵala barshamyzǵa qaıyrly bilim bersin», - dedi bas múftı kirispe sózinde.
QMDB tóraǵasy bolashaqta mundaı sharany Ortalyq Azııa elderiniń Dinı basqarmalary arasynda ótkizý týraly josparda bar ekenin jetkizdi.
Aıta keteıik, bilim dodasyna elimizdiń ár aımaǵynan 9 medreseden kelgen 54 shákirt qatysýda. Olar 2 kezeń boıynsha Islam tarıhy, arab tili, aqıda, fıqh pánderinen synǵa túspek.
Dinı basqarmanyń bilikti mamandary shákirtterdiń bilim deńgeıin anyqtap, ıgi shara sońynda «júzden júırik, myńnan tulpar» shyqqan shákirtterdi baǵaly syılyqtarmen jáne Bas múftıdiń alǵys hatymen marapattaıdy.
