Qazaqstanda medıtsınalyq uıymdardy ulttyq akkredıtteý qarqyny kúsheıdi

ASTANA.KAZINFORM — Búgingi tańda elimizdiń 752 medıtsınalyq uıymy akkredıtteý mártebesine ıe, bul akkredıtteýge jatatyn uıymdardyń jalpy sanynyń 57,9%-yn quraıdy. Bul týraly Densaýlyq saqtaý mınıstrligi málim etti. 

Vedomstvonyń málimetinshe, 2024 jyly bul 557 medıtsınalyq uıym akkredıtteýden ótse, 2023 jyly 447 medıtsınalyq uıym akkredıtteýden ótken. 

— Akkredıtteýden ótýdi yntalandyrýdyń mańyzdy faktory medıtsınalyq qyzmetterdi satyp alý kezinde uzaq merzimdi sharttardy engizý boldy, munda negizgi ólshemsharttardyń biri bolyp akkredıtteýdiń birinshi nemese joǵary sanatynyń bolýy tabylady. Bul tásil bir mezgilde medıtsınalyq kómektiń sapasyn arttyrýǵa jáne medıtsınalyq uıymdar úshin ashyq jáne teń jaǵdaı jasaýǵa múmkindik beredi, — delingen habarlamada.

Medıtsınalyq uıymdardyń tartylýyn arttyrý maqsatynda stomatologııalyq kómek kórsetetin uıymdar úshin akkredıtteýdiń jańa standarty ázirlendi. 

Mınıstrliktiń dereginshe, 2026 jyly beıindi medıtsınalyq uıymdar — gemodıalız ortalyqtary, psıhıkalyq densaýlyq ortalyqtary, ftızıopýlmonologııa ortalyqtary jáne basqa da mamandandyrylǵan mekemeler úshin akkredıtteý standarttaryn ázirleýdi qosa alǵanda, ádisnamalyq jumysty jalǵastyrý josparlanǵan.

2026 jylǵa arnalǵan basty maqsat respýblıkanyń medıtsınalyq uıymdarynyń 60%-yn ulttyq akkredıtteýmen qamtý bolyp tabylady. Bul kórsetkishke qol jetkizý halyqqa kórsetiletin medıtsınalyq kómektiń sapasy men qaýipsizdigin arttyrýdaǵy mańyzdy qadam bolady.

Ulttyq akkredıtteý júıesin damytý densaýlyq saqtaý salasyndaǵy memlekettik saıasattyń basym baǵyttarynyń biri bolyp qala beredi.

Vedomstvonyń paıymynsha, sońǵy jyldary óńirlerdegi medıtsınalyq uıymdardyń medıtsınalyq kómektiń sapasy men qaýipsizdigin qamtamasyz etýdiń negizgi tetigi retinde ulttyq akkredıtteýden ótýge degen qyzyǵýshylyǵynyń turaqty ósýi baıqalǵan.

Buǵan deıin medıtsına qyzmetkerleriniń eńbekaqysy kóterilip, qaýipsizdigi kúsheıtiletinin jazdyq.