Qazaqstanda medıtsınalyq saraptamaǵa elektrondy kezek engizildi
ASTANA. KAZINFORM — Qazaqstanda medıtsınalyq-áleýmettik saraptamadan (MÁS) ótý úshin elektrondyq kezek servısi engizilip jatyr. Jańa múmkindik azamattarǵa kózbe-kóz kýálandyrýdan ótýge aldyn ala jazylyp, ózine yńǵaıly kún men ýaqytty tańdaýǵa jaǵdaı jasaıdy.
Qazaqstan Respýblıkasy Eńbek jáne halyqty áleýmettik qorǵaý mınıstrliginiń málimetinshe, bul jańashyldyq memlekettik qyzmetterdi tsıfrlyq transformatsııalaý jumystary aıasynda júzege asyrylyp jatyr.
Eńbek jáne halyqty áleýmettik qorǵaý mınıstrliginiń habarlaýynsha, qazirgi ýaqytta elektrondyq kezek servısi Aqmola oblysy men Almatyda pılottyq rejımde iske qosylǵan. Jańa tetik MÁS bólimshelerine kelýshilerdi qabyldaý úderisin tıimdi uıymdastyrýǵa jáne kútý ýaqytyn qysqartýǵa múmkindik beredi.
— Sonymen qatar elektrondyq kezek kelýshiler aǵynyn jumys kúni boıyna birkelki bólýge, qabyldaýdy uıymdastyrý tıimdiligin arttyrýǵa jáne azamattar men mamandar úshin qolaıly jaǵdaı qalyptastyrýǵa baǵyttalǵan, — delingen habarlamada.
Mınıstrlik málimetine qaraǵanda, pılottyq joba iske qosylǵaly beri aldyn ala jazylý múmkindigin 2,8 myńǵa jýyq adam paıdalanǵan.
Vedomstvo ókilderi atap ótkendeı, tsıfrlyq quraldardy engizý MÁS salasyndaǵy memlekettik qyzmetterdiń qoljetimdiligi men sapasyn arttyrýǵa baǵyttalǵan. Bul rette medıtsınalyq-áleýmettik saraptamany júrgizýdiń qoldanystaǵy tártibi saqtalady.
Eske salaıyq, buǵan deıin Qazaqstanda endi elektrondyq jeke medıtsınalyq kitapsha barlyq adamǵa qoljetimdi ekenin jazǵanbyz.
