Qazaqstanda medıtsınalyq rezıdentýraǵa qabyldaý tolyq tsıfrlyq formatqa kóshedi
ASTANA. KAZINFORM — Densaýlyq saqtaý mınıstrligi rezıdentýraǵa memlekettik tapsyrysty ornalastyrý, oqýǵa qabyldaý jáne medıtsına kadrlaryn daıarlaý qaǵıdalaryna ózgerister engizý týraly buıryq jobasyn qoǵamdyq talqylaýǵa shyǵardy, dep habarlaıdy Kazinform tilshisi.
Qujatqa sáıkes, negizgi jańashyldyq — rezıdentýranyń biryńǵaı tsıfrlyq platformasyn engizý. Jańa júıe bolashaq medıtsına mamandaryn qabyldaý men daıarlaýdyń negizgi kezeńderin avtomattandyrýǵa múmkindik beredi.
Mınıstrliktiń málimetinshe, qujattardy qabyldaý onlaın formatta júzege asady, konkýrstyq irikteý avtomattandyrylady, al bilim granttaryn bólý úderisi ashyq ári aıqyn bolady. Sondaı-aq talapkerlerdi avtomatty túrde reıtıngteý tetigi qarastyrylǵan.
Vedomstvo ókilderiniń aıtýynsha, tsıfrlandyrý sybaılas jemqorlyq táýekelderin jáne adamı faktordy azaıtyp, ótinimderdi qaraý men sheshim qabyldaý merzimderin qysqartýǵa yqpal etedi.
Budan bólek, jańa platforma medıtsınalyq bilim berý uıymdaryn, ǵylymı ortalyqtardy, ǵylymı-zertteý ınstıtýttaryn jáne densaýlyq saqtaý uıymdaryn biryńǵaı aqparattyq keńistikke biriktiredi. Bul medıtsına kadrlaryn daıarlaý sapasyn arttyryp, bilim berý jáne klınıkalyq bazalar arasyndaǵy ózara baılanysty kúsheıtýge múmkindik beredi.
Mınıstrliktiń habarlaýynsha, tsıfrlyq sheshimder jas mamandar úshin oqýǵa túsý rásiminiń qoljetimdiligin, ádildigin jáne yńǵaılylyǵyn arttyrýǵa baǵyttalǵan.
Joba Qazaqstan Respýblıkasynda Joǵary bilim men ǵylymdy damytýdyń 2023–2029 jyldarǵa arnalǵan tujyrymdamasy aıasynda ázirlengen.
Qujatty qoǵamdyq talqylaý 2026 jylǵy 15 maýsymǵa deıin jalǵasady. Eger buıryq qabyldansa, «Rezıdentýranyń tsıfrlyq platformasy» aqparattyq júıesi men avtomattandyrylǵan konkýrstyq rásimder 2026–2027 oqý jylynda engizilýi múmkin.
Budan buryn habarlanǵandaı, Densaýlyq saqtaý mınıstriniń birinshi orynbasary Tımýr Sultanǵazıev Senat otyrysynda ıntern-dárigerlerge medıtsınalyq aqparat júıelerine kirýge ruqsat beriletinin aıtty.
