Qazaqstanda medıtsınalyq kómektiń 92%-y avtomatty túrde júzege asyrylady

ASTANA. KAZINFORM – Premer-mınıstr Oljas Bektenov Memleket basshysynyń medıtsınalyq qyzmetterdiń sapasyn arttyrý boıynsha qoıǵan mindetteri sheńberinde densaýlyq saqtaý salasyn tsıfrlandyrý máselesi boıynsha keńes ótkizdi.

Onda Densaýlyq saqtaý mınıstrliginiń Áleýmettik medıtsınalyq saqtandyrý qorynyń qyzmetin jetildirýge jáne tsıfrlyq transformatsııasyna qatysty tásilderi qaraldy. Halyqqa MÁMS sheńberinde kórsetiletin medıtsınalyq kómektiń qoljetimdiligi men sapasyn arttyrý boıynsha júrgizilip jatqan jumystarǵa nazar aýdaryldy.

Qazaqstanda mindetti áleýmettik medıtsınalyq saqtandyrý júıesimen shamamen 17 mln adam qamtylǵan, onyń 12 mln-ǵa jýyǵy jeńildikke ıe sanattarǵa jatady. Densaýlyq saqtaý mınıstri Aqmaral Álnazarova MÁMS qarajatynyń jıyntyq kólemi 6 jyl ishinde 6,8 trln teńgeden asqanyn baıandady, onyń 2 trln teńgesi – azamattardyń jeńildikke ıe sanattary úshin berilgen memlekettik jarnalar. Tek bıyldyń ózinde ǵana osy maqsattarǵa 1,4 trln teńge aýdarylǵan.

Jıynǵa qatysýshylar mindetti áleýmettik saqtandyrý paketi 2026 jyldyń 1 qańtarynan bastap keńeıtiletinine baılanysty tsıfrlyq tetikterdi engizý arqyly qadaǵalaýdy kúsheıte túsý jáne júıeniń ashyqtyǵy máselelerin talqylady. Keler jyldan bastap halyqty mindetti áleýmettik medıtsınalyq saqtandyrýmen qamtý aıtarlyqtaı keńeımek. Tıisti zańnamalyq ózgerister jańa jyldan bastap kúshine enedi.

Búginde Qazaqstanda medıtsınalyq kómektiń 92%-y avtomatty túrde júzege asyrylady. 2026 jyldyń sońyna deıin ony 100%-ǵa deıin jetkizý josparlanyp otyr, bul adamı faktordy tolyǵymen alyp tastaýǵa múmkindik beredi.

Odan bólek satyp alý, medıtsınalyq qyzmetterge aqy tóleý sııaqty basqa da negizgi bıznes-protsester tsıfrlandyryldy. Qordyń aqparattyq júıesin Densaýlyq saqtaý, Eńbek jáne halyqty áleýmettik qorǵaý mınıstrlikteri jáne eGov júıelerimen ıntegratsııalaý jeńildikke ıe sanattar boıynsha derekterdiń avtomatty túrde jańartylýyn qamtamasyz etti jáne medıtsınalyq saqtandyrý júıesi jarnalaryn esepke alýdyń dáldigin arttyrdy.

Bıyl halyqtyń medıtsınalyq qyzmetter kólemine naqty qajettiligin esepteýdi eskere otyryp, josparlaý qaǵıdalaryn, ádisteri men tásilderin bekitý mańyzdy qadam boldy. Kelesi jyly josparlaýdyń barlyq protsesin tsıfrlandyrý aıaqtalady, bul esepteýlerdi tek burynǵy derekter negizinde ǵana emes, sonymen qatar kórsetilgen medıtsınalyq kómektiń naqty kólemin jáne boljamdardy eskere otyryp júzege asyrýǵa múmkindik beredi.

2025 jyldyń 1 shildesinen beri medıtsınalyq qyzmetterdiń sapasyna monıtorıng jasaý jáne aqy tóleý biryńǵaı tsıfrlyq kontýrǵa biriktirilgen. Jańa modýl tólem qujattarynyń sanyn 9-dan 3-ke deıin qysqartty jáne 1S býhgalterııamen úzdiksiz ıntegratsııany qamtamasyz etti. Sonymen birge júıeniń «álsiz tustary» da anyqtaldy. Yqtımal táýekelder Densaýlyq saqtaý mınıstrliginiń baqylaýynda, olar tsıfrlyq quraldardy engizý arqyly joıylady.

Medıtsınalyq uıymdarda Face ID júıesi engizilýde, bul búginde medıtsınalyq mekemeler tarapynan tirkeýler sanyn 7%-ǵa tómendetýge jáne bıýdjet qarajatynyń shamamen 10,5 mlrd teńgesin únemdeýge múmkindik berdi.

Kelesi jyly medıtsınalyq qyzmetterdi bólý úshin reıtıngtik baǵany esepteý ındıkatorlaryn tolyq tsıfrlandyrý josparlanýda. Sonyń nátıjesinde medıtsınalyq kómektiń joǵary sapasy men qoljetimdiligin qamtamasyz ete alǵan jetkizýshiler qarjylandyrý múmkindigine ıe bolmaq. 2026 jyly medıtsınalyq derekterdiń biryńǵaı qoımasyn qalyptastyrý jónindegi jumystyń aıaqtalýy kórsetiletin medıtsınalyq kómekti josparlaý men sapasyn jaqsartýǵa áser etedi.

Halyqqa arnalǵan dári-dármekterdi josparlaý men berý tıimdiligi máselelerine bólek nazar aýdaryldy. Klınıkalyq hattamalardy tsıfrlandyrý jáne birlesip tóleý tetikterin engizý boıynsha kezeń-kezeńmen jumystar júrgizilýde, bul em alýshylardy qajetti preparattarmen qamtamasyz etý úderisterin ońtaılandyrýǵa múmkindik beredi.

«Bizdiń baǵyt – kórsetiletin medıtsınalyq qyzmetterdiń sapasyn únemi jaqsarta otyryp, qoljetimdiligin arttyrý. Tsıfrlandyrýdyń alǵashqy nátıjelerin qazirdiń ózinde kórip otyrmyz. Ozyq tehnologııalardy qarqyndy engizýdi jalǵastyrý qajet.

Protsesterdi avtomattandyrý medıtsınalyq personaldy bıýrokratııalyq rásimderden bosatyp qana qoımaı, emdeý men dári-dármekke bólingen qarajattyń jumsalýynyń ashyqtyǵyn qamtamasyz etedi. Sol kezde azamattar da, dárigerler de, memleket te reformalardyń nátıjelerin aıqyn kóretin bolady», - dep atap ótti Oljas Bektenov.

Jıyn qorytyndysy boıynsha Premer-mınıstr Densaýlyq saqtaý, Jasandy ıntellekt jáne tsıfrlyq damý mınıstrlikterine protsesterdi tsıfrlandyrý jumysyn jandandyrýdy tapsyrdy. Qarjy mınıstrligi densaýlyq saqtaý júıesinde qarjylyq tártipti kúsheıtý jóninde sharalar qabyldaıdy.

Aıta keteıik, Qazaqstanda ókpe obyryna mindetti skrınıng engizilýi múmkin.