Qazaqstanda medıtsınalyq derekterge qol jetkizý qaǵıdalary ózgeredi
ASTANA. KAZINFORM — Qazaqstanda azamattardyń medıtsınalyq derekterin qorǵaý talaptaryn kúsheıtý josparlanyp otyr. Densaýlyq saqtaý mınıstrligi «Tsıfrlyq densaýlyq saqtaý sýbektileriniń qol jetkizý quqyqtarynyń arajigin ajyratý qaǵıdalaryn bekitý týraly» buıryqqa ózgerister engizýdi usynyp otyr.
Jańa túzetýler medıtsınalyq aqparattyń qaýipsizdigin arttyrýǵa, kıberqaýipsizdik júıesin kúsheıtýge jáne densaýlyq saqtaý salasyndaǵy derbes derektermen jumys isteýdiń biryńǵaı tártibin qalyptastyrýǵa baǵyttalǵan.
Mınıstrlik qazirgi tańda tsıfrlyq servısterdiń qarqyndy damýy aqparattyq qaýipsizdik talaptaryn únemi jańartyp otyrýdy qajet etetinin atap ótti. Osyǵan baılanysty medıtsınalyq aqparattyq júıelerge qoıylatyn tehnıkalyq talaptardy jetildirý kózdelip otyr.
Jobaǵa sáıkes, menshik nysanyna qaramastan, barlyq medıtsınalyq uıym úshin patsıentterdiń jeke medıtsınalyq derekterine qol jetkizý tártibi naqtylanady. Sonymen qatar, paıdalanýshylardyń medıtsınalyq aqparattyq júıelerge kirý quqyqtaryn shekteý jáne ajyratý talaptary kúsheıtiledi.
Sondaı-aq, patsıentterdiń derekter qupııalylyǵyn saqtaý boıynsha tehnıkalyq ári uıymdastyrýshylyq talaptardy jańartý usynylǵan.
Mınıstrlik engiziletin ózgerister azamattardyń medıtsınalyq kómek alý quqyǵyna eshqandaı shekteý qoımaıtynyn málimdedi. Túzetýler tek medıtsınalyq aqparatty saqtaý men óńdeýdiń qaýipsizdigin arttyrýǵa baǵyttalǵan.
— Ózgerister medıtsınalyq qyzmet kórsetý tártibin ózgertpeıdi jáne halyq úshin tsıfrlyq servısterdiń qoljetimdiligine áser etpeıdi, — delingen qujatta.
Vedomstvonyń málimetinshe, jańa talaptar densaýlyq saqtaý salasynyń tsıfrlyq ınfraqurylymynyń turaqtylyǵyn arttyryp, derekterge zańsyz qol jetkizý táýekelderin azaıtýǵa múmkindik beredi. Sonymen qatar azamattardyń jeke medıtsınalyq málimetterin qorǵaý deńgeıi kúsheımek.
Aıta keteıik, túzetýler 2026 jylǵy 9 qańtarda qabyldanǵan Qazaqstan Respýblıkasynyń Tsıfrlyq kodeksine jáne tsıfrlandyrý máseleleri boıynsha zańnamalyq ózgeristerge sáıkes ázirlengen.
Qujat qoǵamdyq talqylaý úshin «Ashyq NQA» saıtynda 8 maýsymǵa deıin jarııalanǵan.
Eske salaıyq, Qazaqstanda densaýlyq saqtaý júıesin tsıfrlandyrý kúsheıtiledi.
Kamıla Taıtóleý
