Qazaqstanda medıtsınalyq-áleýmettik saraptama júıesinde táýelsiz sarapshylar ınstıtýty paıda boldy

ASTANA. KAZINFORM — 2025 jylǵy 1 qańtardan bastap Qazaqstanda medıtsınalyq uıymdar medıtsınalyq-áleýmettik saraptamaǵa (MÁS) syrttaı proaktıvti formatta jiberetin azamattardy kýálandyrý jónindegi táýelsiz sarapshylar ınstıtýty engizildi.

Táýelsiz sarapshylar ınstıtýtyn engizý densaýlyq saqtaý uıymdarynyń beıindi mamandaryn medıtsınalyq-áleýmettik saraptamaǵa tartýǵa múmkindik beredi, sondaı-aq MÁS qyzmetin kadrlarmen qamtamasyz etý máselelerin sheshýge yqpal etedi, sybaılas jemqorlyq quqyq buzýshylyq táýekelderin azaıtady jáne múgedektikti belgileý boıynsha memlekettik qyzmet kórsetý sapasyn arttyrady.

- Osy ınstıtýtty tıimdi engizý maqsatynda 2024 jylǵy qyrkúıekten jeltoqsanǵa deıin pılottyq rejımde medıtsınalyq-áleýmettik saraptamaǵa táýelsiz sarapshylardy tartý tetigi synaldy. Pılottyq jobaǵa 18 dáriger qatysyp, MÁS-tiń 7 532 aktisi qaraldy.

Pılottyq jobanyń nátıjeleri boıynsha qoldanystaǵy normatıvtik quqyqtyq aktilerge ózgerister men tolyqtyrýlar engizildi, - dep jazdy Eńbek jáne halyqty áleýmettik qorǵaý mınıstrliginen.

Qazirgi ýaqytta QR Eńbek jáne halyqty áleýmettik qorǵaý mınıstrliginiń Áleýmettik qorǵaý salasyndaǵy retteý jáne baqylaý komıteti medıtsınalyq-áleýmettik saraptamanyń táýelsiz sarapshylarynyń tizilimine engizý úshin úmitkerlerdiń qujattaryn qabyldaýda. Ótinishter Áleýmettik qyzmetter portaly (aleumet.egov.kz) arqyly beriledi, bul rette úmitkerler derbes derekterdi jınaýǵa jáne óńdeýge kelisim beredi.

Buryn habarlanǵandaı, búginde syrttaı kýálandyrý 30 nozologııalyq nysan boıynsha júrgiziledi. 2025 jyldyń basynan beri osy formatta Qazaqstannyń barlyq óńirlerinen MÁS-ke túsken 8,5 myńnan astam ótinim qaraldy.

Aıta keteıik, medıtsınadaǵy joǵary mólsherleme medkómekke qol jetkizýdi qıyndatýy múmkin ekenin jazǵanbyz.