Dáriger qaýipsizdigi kúsheıtiledi: mınıstrlikter kúsh biriktiredi

ASTANA. KAZINFORM — Densaýlyq saqtaý mınıstrligi Іshki ister mınıstrligimen birge medıtsına uıymdarynda qoǵamdyq tártipti saqtaý, qyzmettik mindetin atqaryp júrgen medıtsına qyzmetkerlerine kúsh kórsetý men agressııany boldyrmaý úshin qaýipsizdikti qamtamasyz etýge baǵyttalǵan ortaq tujyrymdama ázirleıdi.

Densaýlyq saqtaý mınıstrliginiń habarlaýynsha, medıtsına mekemesiniń qaýipsizdik talaptary kórsetiletin kómektiń túri men deńgeıine, sondaı-aq patsıentter leginiń tyǵyzdyǵyna baılanysty belgilenedi. 

— Medıtsına qyzmetkeriniń ómiri men densaýlyǵyna qaýip tóndirgen árbir adam zańǵa sáıkes qatań jazalanýy tıis. Eshbir jaǵdaı mundaı áreketti aqtaı almaıdy. Árbir dáriger, feldsher, meıirger — biz úshin qymbat. Biz — bir komandamyz. Árbir maman ózin qaýipsiz sezinýi qajet, — dedi Densaýlyq saqtaý mınıstri Aqmaral Álnazarova Qaraǵandyda patsıenttiń týysy tarapynan shabýylǵa ushyraǵan balalar dárigerlerine barǵan saparynda.

Mınıstrdiń aıtýynsha, qazir pılottyq joba retinde Astana men Almaty qalalarynda jedel járdem qyzmetkerlerine jetondar engizilip jatyr. Bul tártip buzýǵa beıim adamdarǵa psıhologııalyq tosqaýyl bolady. Sonymen qatar barlyq aýrýhana men emhanada shuǵyl jaǵdaı kezinde jedel áreket etýge arnalǵan dabyl batyrmalary jumys isteýi tıis.

— Medıtsına qyzmetkerleriniń qaýipsizdigin qamtamasyz etýge arnalǵan keshendi sharalar Densaýlyq saqtaý mınıstrligi, Іshki ister mınıstrligi, basqa da múddeli memlekettik organdar men jergilikti atqarýshy organdardyń qatysýymen ázirlenedi. Sońǵy 5 jyldyń ishinde medıtsına qyzmetkerlerine 160-qa jýyq shabýyl jasaý faktisi tirkelip, saldarynan dárigerler túrli jaraqattar alǵan, — delingen vedomstvo taratqan habarlamada.

Aıta ketsek, 13 maýsymda Prezıdenttiń Jarlyǵymen otandyq medıtsınany damytýǵa qosqan eleýli úlesi jáne azamattardyń densaýlyǵyn saqtaýdaǵy qajyrly eńbegi úshin sala mamandary nagradtaldy.