Qazaqstanda medıtsına qyzmetkerleriniń kásibı mártebesi zańmen bekitilýi múmkin
ASTANA. KAZINFORM — Quryltaı depýtaty Dana Medeýovanyń bastamasymen «Medıtsına qyzmetkeriniń kásibı mártebesi — ulttyq qaýipsizdik faktory» taqyrybynda dóńgelek ústel otyrysy ótti.
Іs-shara «Medıtsına qyzmetkerleriniń kásibı mártebesi jáne qyzmetiniń kepildikteri týraly» zań jobasymen jumys aıasynda uıymdastyryldy. Qatysýshylar medıtsına qyzmetkerleriniń kásibı mártebesi men qorǵalýyn nyǵaıtý túptep kelgende medıtsınalyq kómektiń sapasyn arttyrýǵa, azamattardyń densaýlyǵyn saqtaýǵa jáne olardyń ómir súrý sapasyn jaqsartýǵa baǵyttalǵanyn atap ótti.
Jıynǵa Quryltaı depýtattarymen qatar Prezıdenttiń áleýmettik máseleler jónindegi keńesshisi Alekseı Tsoı, Densaýlyq saqtaý birinshi vıtse-mınıstri Tımýr Sultanǵazıev, Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev, Ulttyq ekonomıka vıtse-mınıstri Asan Darbaev, Ádilet vıtse-mınıstri Danıel Vaısov, sondaı-aq ýákiletti memlekettik organdardyń, medıtsınalyq uıymdardyń, joǵary oqý oryndarynyń jáne sarapshylar qaýymdastyǵynyń ókilderi qatysty.
Densaýlyq saqtaý birinshi vıtse-mınıstri Tımýr Sultanǵazıev bul bastamany salalyq mınıstrlik qoldaıtynyn málimdedi. Onyń aıtýynsha, aldaǵy retteý sharalarynda medıtsına qyzmetkerleriniń naqty quqyqtary men mindetteri, olardyń quqyqtyq jáne fızıkalyq qorǵalý tetikteri, kásibı jaýapkershiliktiń aıqyn shekaralary, laıyqty eńbek jaǵdaılary men áleýmettik kepildikteri eskerilýi qajet.
Óz kezeginde S. J. Asfendııarov atyndaǵy Qazaq ulttyq medıtsına ýnıversıtetiniń birinshi prorektory Dılıara Qaıdarova medıtsına kadrlaryn daıarlaý máselesin jeke baǵyt retinde atap ótti.
— Myqty dáriger myqty medıtsınalyq bilim berý júıesinen bastalady. Sondyqtan medıtsına qyzmetkerin qorǵaý medıtsınalyq ýnıversıtet qabyrǵasynan, ıaǵnı daıarlyq sapasynan, oqytýshyǵa laıyqty eńbek jaǵdaıyn jasaýdan, zamanaýı klınıkalyq bazadan jáne jas mamannyń túsinikti kásibı traektorııasynan bastalýy kerek, — dedi Dılıara Qaıdarova.
Ulttyq medıtsınalyq qaýymdastyqtyń prezıdenti Saltanat Mamyrova medıtsına qyzmetkerleriniń kásibı mártebesin aıqyndaý kezinde medıtsınalyq kásibıliktiń halyqaralyq qaǵıdattaryn eskerýdi usyndy.
Al «SENIM» jergilikti kásipodaǵy» qoǵamdyq birlestiginiń tóraǵasy Serik Kákenov medıtsınalyq ıntsıdentter týyndaǵan jaǵdaıda dárigerlerdi qorǵaý máselesine nazar aýdaryp, «ádiletti mádenıet» qaǵıdatyn bekitýdi usyndy.
Medıtsına qyzmetkeriniń kásibı mártebesi týraly zań jobasynyń bastamashysy, depýtat Dana Medeýova joǵaryda aıtylǵan barlyq másele qujatpen jumys isteýdiń negizine aınalatynyn atap ótti.
— Osy aptada jarııa etilgen depýtattyq saýalda biz dárigerdiń kásibı mártebesi máselesin bıologııalyq jáne ulttyq qaýipsizdiktiń sharty retinde kóterdik. Bul rette atalǵan jumystyń túpki maqsaty — eń aldymen azamattarymyzdyń múddesi, atap aıtqanda, olardyń densaýlyǵyn saqtaý jáne nyǵaıtý. Medıtsına qyzmetkerleriniń kásibı qyzmetine jáne olardy qorǵaýǵa qajetti jaǵdaı jasaı otyryp, biz eń aldymen sapaly medıtsınalyq kómek kórsetýge jáne adamdardyń densaýlyǵyn saqtaýǵa yqpal etetin bolamyz. Búgin biz memlekettik organdar, medıtsınalyq uıymdar, joǵary oqý oryndary jáne kásibı qaýymdastyq ókilderiniń ustanymdaryn tyńdadyq. Zań jobasyn ázirleý barysynda barlyq syndarly usynys eskeriletin bolady. Qabyldanatyn sheshimderdiń azamattardyń múddesine qyzmet etip, olardyń ómir súrý sapasyn jaqsartýǵa yqpal etýi biz úshin mańyzdy, — dedi Dana Medeýova.
Dóńgelek ústel qorytyndysy boıynsha túsken usynystar men usynymdar jınaqtalyp, jumys tobynyń qaraýyna usynylady.
Buǵan deıin Almatyda dárigerler kózine tas kirgen naýqastyń kórý qabiletin saqtap qalǵanyn jazǵanbyz.
