Qazaqstanda medıtsına qyzmetkerleriniń atyn jamylǵan alaıaqtyq derekteri kóbeıgen
ASTANA. KAZINFORM – QR Densaýlyq saqtaý mınıstrligi azamattardy medıtsınalyq uıymdar atynan túsetin kúmándi qońyraýlarǵa baılanysty saq bolýǵa shaqyrdy.
Áleýmettik jelilerde emhanalarǵa barǵannan keıin azamattarǵa túsetin kúmándi qońyraýlar týraly aqparattyń taralýyna baılanysty vedomstvo belgisiz tulǵalarǵa SMS-kodtardy jáne jeke derekterdi bermeýdi, sondaı-aq kúmándi siltemelerge ótpeýdi eskertedi.
Mınıstrliktiń málimetinshe, mundaı jaǵdaılar elimizdiń ártúrli óńirlerinde tirkelip otyr jáne kóbine medıtsınalyq uıymdardyń qyzmetine qatysy joq. Alaıaqtar azamattardyń, sonyń ishinde egde jastaǵy adamdardyń senimine kirip, ózderin emhana nemese ózge mekeme qyzmetkerleri retinde tanystyrady.
Osyǵan baılanysty Densaýlyq saqtaý mınıstrligi kelesi saqtyq sharalaryn ustanýǵa shaqyrady:
– SMS-kodtardy jáne jeke derekterdi úshinshi tulǵalarǵa bermeý;
– telefon arqyly alynǵan aqparattyń shynaıylyǵyn mindetti túrde tekserý;
– kúmándi qońyraýlar bolǵan jaǵdaıda óz medıtsınalyq uıymyna nemese quqyq qorǵaý organdaryna júginý.
Sondaı-aq azamattarǵa ózderiniń tirkelý mártebesin eGov.kz/eGov Mobile portaly nemese Damumed qosymshasy arqyly derbes tekserý usynylady.
Vedomstvonyń málimdeýinshe, medıtsınalyq uıymdarǵa qabyldaýǵa jazylý eGov.kz nemese eGov Mobile portaly, medıtsınalyq aqparattyq júıelerdiń mobıldi qosymshalary, sondaı-aq tirkeý bólimine telefon arqyly júzege asyrylady.
«SMS-kodtar patsıentterge tek tsıfrlyq servısterde avtorızatsııadan ótý barysynda ǵana jiberiledi. Medıtsınalyq uıym qyzmetkerleri telefon arqyly SMS-kodtardy suramaıdy», – dep atap ótti mınıstrlik.
Qazirgi ýaqytta patsıentterdiń qabyldaýǵa barǵanyn naqty ýaqyt rejıminde baqylaýǵa múmkindik beretin júıelerdiń buzylýy nemese ruqsatsyz qol jetkizý faktileri tirkelmegen.
Mınıstrlik dereginshe, azamattardyń jeke derekteriniń yqtımal taralýyna qatysty resmı ótinishter túsken jaǵdaıda ýákiletti memlekettik organdardyń qatysýymen tıisti tekserýler júrgiziledi.
Vedomstvo mundaı jaǵdaılar azamattardy jańylystyrý arqyly olardyń jeke derekteri men qarjylyq servısterine qol jetkizýge baǵyttalǵan keń taralǵan alaıaqtyq shemalardyń belgilerine sáıkes keletinin atap ótti.
Densaýlyq saqtaý mınıstrligi tsıfrlyq servısterdiń qaýipsizdigin qamtamasyz etý jáne azamattardyń jeke derekterin qorǵaý boıynsha jumysty jalǵastyryp jatqanyn málimdedi.
Aıta keteıik, ІІM Qazaqstanda alaıaqtyqtyń jańa tásili taralyp jatqanyn eskertti.
