Qazaqstanda medıtsına qyzmetkerlerin saqtandyrý erejeleri ózgerýi múmkin
ASTANA. KAZINFORM – Elimizde medıtsına qyzmetkerleriniń kásiptik jaýapkershiligin saqtandyrý júıesin jetildirý josparlanyp otyr. Densaýlyq saqtaý mınıstrligi osy baǵyttaǵy birneshe buıryqqa ózgerister engizýdi usynyp, qujatty qoǵamdyq talqylaýǵa shyǵardy, dep habarlaıdy Kazinform agenttiginiń tilshisi.
Jańa túzetýler eń aldymen aqparattyq qaýipsizdikti kúsheıtýge jáne saqtandyrý rásimderin naqtylaýǵa baǵyttalǵan. Mınıstrlik ásirese qujat aınalymy kezinde qyzmettik aqparattyń qorǵalýyna basa nazar aýdaryp otyr.
Jobaǵa sáıkes, arnaıy memlekettik organdarǵa qarasty keıbir medıtsınalyq uıymdar úshin saqtandyrý sharttaryn jasaý, ózgertý jáne buzý tártibi naqtylanady. Sonymen qatar, ınternet-platformalar arqyly beriletin keıbir málimetterge qatysty qosymsha shekteýler engizý usynylǵan.
Odan bólek, ózgerister tehnıkalyq sıpatta bolady jáne halyqqa medıtsınalyq kómek kórsetý tártibine áser etpeıdi.
– Túzetýler patsıentterdiń quqyqtaryna, medıtsınalyq qyzmet alý sharttaryna nemese azamattarǵa túsetin júktemege yqpal etpeıdi. Negizgi maqsat – aqparattyq qaýipsizdikti kúsheıtip, saqtandyrý júıesiniń jumysyn tıimdi etý, - delingen qujatta.
Mınıstrlik qazirgi tańda medıtsınalyq uıymdardaǵy qujat aınalymyn tsıfrlyq qaýipsizdik talaptaryna saı jetildirý mańyzdy ekenin málimdedi. Osyǵan baılanysty taralýy shekteýli aqparatty qorǵaý boıynsha qosymsha sharalar engizilmek.
Joba «Halyq densaýlyǵy jáne densaýlyq saqtaý júıesi týraly» kodeks, «Memlekettik satyp alý týraly» jáne «Poshta týraly» zańdar negizinde ázirlengen.
Qujat 11 maýsymǵa deıin qoǵamdyq talqylaýda bolady.
Eger ózgerister qabyldansa, bul medıtsına qyzmetkerleriniń kásiptik jaýapkershiligin saqtandyrý júıesin tıimdirek retteýge jáne qyzmettik aqparattyń qorǵalý deńgeıin arttyrýǵa múmkindik beredi.
Aıta keteıik, buǵan deıin atalǵan mınıstrlik «Tsıfrlyq densaýlyq saqtaý sýbektileriniń qol jetkizý quqyqtarynyń arajigin ajyratý qaǵıdalaryn bekitý týraly» buıryqqa ózgerister engizýdi usynǵanyn jazǵanbyz.
Kamıla Taıtóleý
