Qazaqstanda medıtsınalyq jedel járdem avtoparki jańartylady
ASTANA. 5 shilde. QazAqparat - QR densaýlyq saqtaý mınıstrligi otandyq óndirýshilerden 2 myń dana Iveco jáne Hyundai markaly arnaıy medıtsınalyq kólikter satyp alý týraly memorandýmǵa qol qoıdy. Bul Qazaqstandaǵy jedel járdem parkin jańartýǵa yqpal etetin bolady.
«Densaýlyq salasy úshin jurtshylyqqa óte qysqa merzim - «altyn saǵat» aralyǵynda bilikti medıtsınalyq kómek kórsete alý asa mańyzdy. Resmı statıstıka boıynsha bul jol apatynan bolatyn adam ólimin 42 paıyz tómendetedi. Ol úshin bizdegi densaýlyq saqtaý salasyna jedel túrde járdem kórsetýge múmkindik beretin zamanaýı jańartylǵan jedel járdem kólikteri kerek», - dedi densaýlyq saqtaý vıtse-mınıstri Erık Baıjúnisov pm.kz saıtyna bergen suhbatynda.
Jobany júzege asyrý jedel járdem parkin jańartyp, qalalyq jáne aýyldyq eldi mekenderdi arnaýly medıtsınalyq baǵyttaǵy kóliktermen jabdyqtaýǵa jaǵdaı týǵyzady.
Vıtse-mınıstrdiń aıtýynsha, kólikterdi otandyq óndirýshilerden satyp alý ıkemdi baǵa saıasatymen qosa, olardyń kólikterdi jóndeý qyzmetin de kórsetýimen de mańyzdy.
Sonymen qosa, kólik jasaýǵa ár óńirden klımat jaǵdaıyna jáne qajetti medıtsınalyq jıyntyqtar quramyna baılanysty jeke tapsyrystar qabyldanady. «AgromashHoldıng» AQ dırektorlar keńesiniń tóraǵasy Dın Kım óz kezeginde zaýyttarynda arnaıy medıtsınalyq baǵyttaǵy kólikter daıyndalǵanyn habarlady.
«QR densaýlyq saqtaý mınıstrliginiń talaptaryna saı, biz IVECO avtokóligi bazasynda kólik jasap, ony eń jańa qondyrǵylarmen jabdyqtadyq. Bul avtokóliktiń sapalyq sıpattamasy álemdik standarttarǵa jaýap beredi», - dedi Dın Kım pm.kz. saıtyna bergen suhbatynda.
Osylaısha, medıtsınalyq baǵyttaǵy avtokólik óndirý otandyq kólik jasaý ónerkásibin damytyp qana qoımaı, qosymsha jumys oryndaryn ashýǵa da múmkindik beredi.
