Qazaqstanda medıtsınalyq týrızm portaly jumys isteı bastady
ASTANA. QazAqparat - Sheteldik patsıentter úshin Qazaqstannyń múmkindikterin tanystyrýǵa arnalǵan www.medicaltourism.kz biryńǵaı onlaın-portaly testik rejımde jumysyn bastap ketti, dep habarlaıdy QazAqparat tilshisi.
Densaýlyqty damytý ortalyǵy respýblıkalyq qyzmetiniń málimetinshe, portal alańy medıtsınalyq uıymdar men olardyń úzdik qurylǵylarmen qamtylýy, usynylatyn qyzmetter men baǵalar, mamandar týraly aqparat alýǵa tolyq múmkindik beredi.
Uıymnyń baspasóz qyzmetinen habarlanyp otyrǵandaı, Qazaqstannyń aıqyn basymdyqtarynyń biri - medıtsınalyq qyzmetti arzan baǵada usyný. Halyqaralyq mamandar bul rette arnaıy saraptama júrgize otyryp, 7 hırýrgııalyq qyzmettiń baǵalaryn salystyrǵan. Osy rette bizdiń eldegi baǵalar medıtsınalyq týrızmde kóshbasshy sanalatyn Úndistandaǵy baǵadan tómen ekeni anyqtalǵan.
Jyl saıyn Qazaqstandaǵy klınıkalarǵa álemniń 45 elinen medıtsınalyq týrıster keledi. Olardyń 90 paıyzy - TMD elderiniń, atap aıtqanda Reseı, Qyrǵyz Respýblıkasy men Ózbekstan elderiniń azamattary. Qalǵan 10 paıyzy - Qytaı, Túrkııa, Iran jáne ózge de elderden keletin kórinedi. Mine, sondyqtan, Qazaqstan aldaǵy ýaqytta áleýetti patsıentterdi tartý úshin shekaralas elderdiń naryǵynda medıtsınalyq qyzmetterdi alǵa jyljyta berýge nıettenip otyr.
Qazaqstandaǵy medıtsınalyq týrızmniń taldaýy kórsetkendeı, týrısterdiń negizgi shoǵyry kardıohırýrgııalyq, neırohırýrgııalyq, stomatologııalyq, býyndardy protezdeý, organdardy transplantatsııalaý sekildi qyzmetterdi alýǵa nıet bildiredi. Mundaı qyzmetter elimizdegi ınnovatsııalyq qurylǵylarmen qamtylǵan eń zamanaýı ortalyqtar men klınıkalarda júrgiziledi. Elimizdegi ondaı klınıkalarda álemdik dárejedegi dárigerler jumys isteıtinin aıta ketý kerek. Ol klınıkalardyń kásibı resýrstary patsıentterdiń qaýipsizdigin qamtamasyz ete otyryp, qyzmet kórsetýdiń joǵary sapasyn usynady.
