Qazaqstanda Medıtsınalyq tehnıkanyń ulttyq bazasy qurylýda
«Medıtsınalyq tehnıkany josparlaý jáne satyp alý kezeńin ashyq júrgizý maqsatynda «Densaýlyq» memlekettik baǵdarlamasymen kózdelgen Medıtsınalyq tehnıkanyń ulttyq bazasyn qurý bolyp tabylady. Qazirgi kezde Qazaqstan Respýblıkasynyń medıtsınalyq buıymdarynyń nomenklatýrasy qalyptastyryldy. «Qazaqstan Respýblıkasynyń keıbir zańnamalyq aktilerine dárilik zattar men medıtsınalyq buıymdar aınalymy máseleleri boıynsha ózgerister men tolyqtyrýlar engizý týraly» zań jobasy ázirlendi, munda Medıtsınalyq tehnıkanyń ulttyq bazasyn qalyptastyrý boıynsha mınıstrliktiń quzyreti kózdelgen», - dedi QR Densaýlyq saqtaý mınıstri Eljan Birtanov Úkimet otyrysynda.
Onyń sózine qaraǵanda, Medıtsınalyq tehnıkanyń ulttyq bazasyn qurý úshin medıtsınalyq tehnıka nomenklatýrasynyń portalyn jáne medıtsınalyq tehnıkany basqarý júıesin ıntegratsııalaý júrgizilýde.
«Bul sharalar jyldyń sońyna deıin aıaqtalady», - dedi ol.
Budan buryn habarlanǵandaı, Qazaqstanda medıtsınalyq tehnıkany tıimdi paıdalanbaý faktileri tergelip jatqandyǵy aıtylǵan bolatyn.
«Memleket basshysynyń tapsyrmasyna sáıkes, mınıstrlik medıtsınalyq tehnıkany paıdalaný tıimdiligin taldaý maqsatynda 2012-2016 jyldar aralyǵynda satyp alynǵan tehnıkaǵa kezeń-kezeńmen tekserý júrgizdi. Sonyń ishinde quny 5 mln teńgeden joǵary medıtsınalyq tehnıkaǵa aýdıt jasaldy. Aýdıt qorytyndylary boıynsha zańbuzýshylyqtar anyqtaldy», - dedi Densaýlyq saqtaý mınıstri Eljan Birtanov.
Osy oraıda satyp alynatyn medıtsınalyq tehnıka qunynyń ulǵaıýy, medıtsınalyq jabdyqtyń jumys istemeı turyp qalýy, medıtsınalyq tehnıkaǵa 3 jyl mindetti servıstik qyzmet kórsetilmeýi jáne basqa da kemshilikter bolǵan.