Qazaqstanda medıtsınalyq tehnıkamen qamtamasyz etý 70 paıyzdy quraıdy
ASTANA. QazAqparat - Elimizdegi densaýlyq saqtaý uıymdaryn medıtsınalyq tehnıkamen qamtamasyz etý máselesin lızıng mehanızmi jáne memlekettik-jekeshelik áriptestik aıasynda sheshken durys. Bul týraly Astanada ótken «Densaýlyq saqtaý salasyn medıtsınalyq tehnıkamen qamtamasyz etýdiń jaǵdaıy: máseleler men sheshý joldary» atty dóńgelek ústelde «QazMedTeh» AQ Basqarma tóraǵasy Rýslan Nursuhanov málim etti, dep habarlaıdy QazAqparati tilshisi.
«Medıtsınalyq tehnıkamen qamtý jaǵdaıy boıynsha búgingi tańda elimizde jolǵa qoıylǵan tájirıbe bar. Birqatar máseleler de joq emes. Máselen, densaýlyq saqtaý uıymynyń medıtsınalyq tehnıkamen az deńgeıde jaraqtandyrylýy, medıtsınalyq tehnıkalardy qoldanýdyń, servıstik qyzmet kórsetýdiń tómen deńgeıi baıqalady», - deıdi Rýslan Nursuhanov.
Onyń aıtýynsha, Qazaqstanda medıtsınalyq tehnıkamen qamtamasyz etilý deńgeıi ortasha eseppen 70 paıyzdy quraıdy. Medıtsınalyq naryqtaǵy naqty qurylymǵa ıe aqparattyń joqtyǵynan densaýlyq saqtaý uıymdary medıtsınalyq tehnıkalardy tehnıkalyq sıpattamasy men baǵasy boıynsha tańdap alýda birshama qınalatyn kórinedi.
«Medıtsınalyq tehnıkalardy satyp alý jaǵdaıyna júrgizilgen monıtorıng jumystary boıynsha 2012-2016 jyldary Densaýlyq saqtaý mınıstrligi aımaqtar boıynsha medıtsınalyq tehnıkalardyń baǵasynyń 1 mıllıard teńgege deıin retsiz ósirilgenin anyqtaǵan. Sybaılas jemqorlyqqa qarsy Ulttyq bıýronyń tergeý jumystarynan keıin, máselen Batys Qazaqstan oblysy boıynsha bıýdjetke 145 mıllıon teńgege jýyq qarajat qaıtarylǵan. Sonymen qatar, tergeý jumystary aımaqtarda áli jalǵasýda», - deıdi ol.
«QazMedTeh» AQ basqarma tóraǵasynyń aıtýyna qaraǵanda, otandyq óndirýshilerdi qoldaýǵa baǵyttalǵan baǵdarlamaǵa qaramastan, kóp jaǵdaıda densaýlyq saqtaý uıymdary qymbat turatyn sheteldik óndirýshilerdiń tehnıkasyn alýdy qolaı kóredi. Al qazirgi tańda medıtsınalyq qurylǵylardyń qyzmet etýi jaǵdaıyna júrgizilgen monıtorıng jumystary dárigerler ornatqan tehnıkalardyń bar-joǵy 20-25 paıyzy paıdalanylatynyn kórsetip otyr.
«Ózderińiz biletindeı, 2015 jyldan bastap respýblıkalyq bıýdjettiń esebinen, ıaǵnı Densaýyq saqtaý mınıstrliginiń qarajatymen medıtsınalyq tehnıkalar satyp alynbaıdy. 2011 jyly medıtsınalyq qurylǵylardy satyp alýǵa 24 mlrd teńge bólinse, 2015 jyly bul soma 0,5 mlrd teńgege deıin azaıdy. 2016-2017 jyldary medıtsınalyq qurylǵylar tek jergilikti bıýdjettiń esebinen satyp alynyp jatty. Úsh jyldyń ishinde 128 mlrd teńgege medıtsınalyq tehnıka satyp alyndy. Alaıda respýblıka boıynsha jyl saıynǵy qajettilik (2015 jylǵy sońǵy ınventarızatsııanyń qorytyndysy boıynsha) - 96 mlrd teńgeni kórsetken edi. Osy rette memlekettik qarajattyń jetispeýshiligi seziledi. Mine, osy máselelerdi lızıng mehanızmi jáne memlekettik-jekeshelik áriptestik aıasynda sheshken durys dep esepteımiz», - deıdi Rýslan Nursuhanov.
