Qazaqstanda medıtsınalyq saqtandyrýdyń alǵashqy júıesi nege iske aspaı qaldy
ASTANA. QazAqparat - «Áleýmettik medıtsınalyq saqtandyrý qory» AQ basqarma tóraıymy Elena Bahmýtova Qazaqstanda 90-jyldary qolǵa alynǵan alǵashqy medıtsınalyq saqtandyrý júıesiniń ne sebepti iske aspaı qalǵanyn aıtyp berdi, dep habarlaıdy QazAqparat tilshisi.
«Árıne, osy joly medıtsınalyq saqtandyrýdyń alǵashqy júıesi kezindegi qatelikterdi qaıtalamaýymyz qajet. Qatelikter jaıynda aıtar bolsaq, ol kezde saltanatty túrde kóp ýádeler berildi. Al sonyń barlyǵyn iske asyrýǵa qarjy da bolǵan joq. Bylaısha aıtqanda, tabys pen shyǵystyń tepe-teńdigi bolmady. Áli esimde, 96-98-shi jyldary men ózim qarjy mınıstrliginde jumys istedim. Sol kezde zeınetaqy da durys berilgen joq. Memlekettiń bereshegi birneshe aıǵa deıin sozyldy. Osyǵan baılanysty jergilikti bıliktiń ýádeleri oryndalǵan joq. Qorǵa tabys ta túspedi. Budan bólek, qordyń turaqtylyǵyn qamtamasyz etetin tetikter jetik bolmady. Endi, osynyń bárin eskerý kerek. Sosyn árbir adam úshin jarnanyń tolyǵymen jınalǵany jaqsy. Qordyń tabysy kóp bolsa, adam ózine qajetti medıtsınalyq kómekti de ala alady», - deıdi Bahmýtova.
Aıta keteıik, áleýmettik medıtsınalyq saqtandyrý júıesi aıasynda 2019 jyldan bastap jumysshylar óz jalaqysynyń 1 paıyzyn qorǵa aýdarady. 2020 jylda atalǵan kórsetkish 2 paıyzǵa deıin kóteriledi. Al jumys berýshilerdiń jarnasy 2017 jyldyń ekinshi jartysynda tólene bastaıdy. Bas kezinde ol 1 paıyzdy qurasa, 2022 jylǵa qaraı 3 paıyzǵa deıin kóteriledi. Jańa júıege stomatologııalyq qyzmetter kirmeıdi .
