Qazaqstanda medıtsınalyq maskalardyń sapasy qalaı tekseriledi
- Elde medıtsınalyq maskalar saraptamadan qalaı ótetinin jáne qalaı tirkeletinin aıtyp berseńiz.
- Dárihanalarda satylatyn medıtsınalyq maskalar Qazaqstanda eń aldymen memlekettik tirkeýden ótkiziledi. Tirkeýge deıin bul buıymdar mindetti túrde saraptamaǵa jiberiledi. Bul saraptamany ótkizýdegi maqsat – onyń sapasyn, tıimdiligi men qaýipsizdigin tekserý. Bul bizdiń eldiń zańnamalyq talaby.
Saraptama birneshe kezeńnen turady: Densaýlyq saqtaý mınıstriniń buıryǵyna sáıkes, tolymdylyǵyn tekserý úshin qujattardy jáne tirkeý qujattarynyń materıaldaryn valıdatsııadan ótkizý. Odan keıingi kezeńde sarapshylar mamandandyrylǵan saraptamada qujattardyń halyqaralyq jáne ulttyq standarttarǵa sáıkestigin synaqtan ótkizedi. Bıologııalyq zertteýler esebi medıtsınalyq maska adamnyń terisine tikeleı janasyp turatyndyqtan, onyń qaýipsizdigin rastaýy tıis. Odan bólek, joǵary tynys alý joldary - muryn qýysy men aýyzǵa jaqyn qoldanýǵa arnalýy qajet.
Tehnıkalyq synaqtyń nátıjesi maskanyń tıimdiligin tekserýge, ol aýany qalaı súzetinin, bakterııa men vırýstardy ustaýda qaýqarlyǵyn bilýge múmkindik beredi. Árıne, osynaý dáleldi bazanyń bárin de zertteý úshin sarapshylar osy synaqtar men zertteýler qalaı ótkizilgenin, olardyń qorytyndysy qalaı rásimdelgenin qadaǵalaýy tıis. Sońynda maska úlgileri sarapshylar uıymynyń Synaq ortalyǵyna túsedi.
Osy synaqtardyń nátıjesinde medıtsınalyq maska úlgileriniń shynaıy kórsetkishteri aıqyndalady. Tekseristiń mundaı amaly tutynýshyǵa sapaly, tıimdi ári qaýipsiz medıtsınalyq maskanyń jetkizilýin qadaǵalaýǵa múmkindik beredi.
- Qazaqstanda tigilgen maskalar ımporttyq buıymdardan erekshelene me?
- Qazir álemde barlyq elge sapasy joǵary bolsyn, tómen bolsyn materıaldar men shıkizat teń dárejede qoljetimdi. Áıtse de qadaǵalaýdyń memlekettik quraly naryqqa otandyq nemese ımporttyq ónim bolsyn, tek tekserilgen buıym túsetindeı jumys júrgizedi.
Tigiletin materıaldarǵa qatysty qabyldanǵan biryńǵaı halyqaralyq talaptarmen qatar, otandyq óndirýshiler óz óndirisinde basqa da talaptardy engizip-aq jatyr. Al bul úderis «ımporttyń bári jaqsy, otandyq ónimniń bári nashar» degen taptaýryn paıymdy joqqa shyǵarady.
- Maskany qalaı tańdaǵan durys? Siz ózińiz qandaı maskany taqqan durys dep oılaısyz?
- Árıne, maskanyń qaı túri bolmasyn óz sıpatyna saı erekshelenedi. Qazir biz olardyń bárin jiktep, taldap, túsindirip otyrsaq, qarapaıym tutynýshy úshin ol uǵymnyń bári de túsiniksiz bolary anyq. Onyń keregi de joq. Ómirdegi ártúrli jaǵdaıǵa baılanysty júıeli ári beıim amal bar.
Qazaqstannyń zańyna sáıkes kez kelgen medıtsınalyq buıymnyń, onyń ishinde medıtsınalyq maska partııasynyń da dárihanaǵa túspes buryn sapasy men qaýipsizdigi rastalýy kerek.
Qaýipsizdik serııasy/partııasy sáıkestik sertıfıkatymen bekitilip, baǵalanady. Onyń kóshirmesin siz kez kelgen dárihanadan talap ete alasyz. Tirkelgen árbir medıtsınalyq maska ony qoldaný nusqaýlyǵymen birge júrýi tıis. Osylaısha jańa aıtqanymdaı, kez kelgen satyp alýshy dárihana qyzmetkerinen sertıfıkattyń kóshirmesin surap, markanyń málimetterine sáıkestigin teksere alady. Qajetti qujattardyń báriniń markaǵa sáıkestigi óz kezeginde buıymnyń sapaly ári qaýipsiz ekenin dáleldeıdi. Alaıda bul turǵyda medıtsınalyq maska nusqaýlyqqa jáne dárigerdiń keńesine saı qoldanylýy kerek.
