Qazaqstanda medıtsınalyq maska jetkilikti – mınıstr

NUR-SULTAN. QazAqparat - Densaýlyq saqtaý mınıstri Eljan Birtanov Qazaqstanda medıtsınalyq maskaǵa qatysty ahýal jaıly aıtyp berdi, dep habarlaıdy QazAqparat tilshisi.

«Maska qajettiligi bar. Dese de, bizde qaýip joq. Alaıda suranys bar, ókinishke qaraı, kóńilde alań basym. Maska jappaı satyp alynǵannan keıin tapshylyq týdyrady. Jalpy, otandyq óndirýshilerdiń Qazaqstanda shyǵaryp otyrǵan maskasy jetkilikti. Bizde jyl saıynǵy tutyný kóleminen eki ese kóp mólsherde maska bar. Sonymen qatar, qajet bolǵan jaǵdaıda biz basqa elderden maska ákelý jóninde kelissóz júrgizýdemiz. Biz búkil halyqty qajetti maskamen qamtamasyz etemiz», - dedi mınıstr OKQ-da ótken baspasóz máslıhatynda.

Sondaı-aq mınıstr Qazaqstanda qazirgi tańda koronavırýs ınfektsııasyn juqtyrý jaǵdaıy tirkelmegenin jetkizdi. Eljan Birtanov qazaqstandyqtardy aldyn alý sharasyna basa mán berýge shaqyrdy.

«Men azamattarymyzǵa mynany aıtqym keledi: búgingi kúni koronavırýs ınfektsııasyna qatysty jaǵdaı Úkimet pen Densaýlyq saqtaý mınıstrliginiń jiti baqylaýynda. Biz barlyq ózgerister týraly da ýaqtyly habarlap otyratyn bolamyz. Jalpy, aldyn alý sharalary kúsheıtilgen. Búginde biz jalpy respıratorlyq ınfektsııalar kezeńinde turmyz. Vırýstyq ınfektsııalardyń aldyn alý úshin, jalpy gıgıena boıynsha standartty sharalar qabyldaý kerek», - dedi mınıstr.