Qazaqstanda medıtsınalyq maska taqpaǵan 2 778 adamǵa aıyppul salyndy

NUR-SULTAN. QazAqparat - 2020 jyldyń 5 shildesinen beri jabyq ǵımaratta, qoǵamdyq oryndarda jáne kóshede maska taqpaǵany úshin 2 778 adamǵa aıyppul salyndy. Bul aqparatty QR Densaýlyq saqtaý mınıstrliginiń resmı ókili Baǵdat Qojahmetov rastady, dep habarlaıdy QazAqparat tilshisi.

«Osy jylǵy shildeniń 5-inen bastap maska taqpaǵany úshin 2 778 jeke tulǵa aıppul túrindegi ákimshilik jaýapqa tartyldy. Olardyń basym bóligi, naqty aıtqanda 2 472-si maska taǵý mindetti jabyq ǵımarattyń ishinde maskasyz júrgeni úshin aıyppul arqalady. 306-sy qoǵamdyq oryndar men kóshede talaptardy oryndamaǵany úshin jaýapqa tartylǵan bolatyn», - dedi ol Ortalyq kommýnıkatsııalar qyzmetindegi brıfıng barysynda.

Onyń aıtýynsha, karantın talaptaryn buzǵandar densaýlyq saqtaý, quqyq qorǵaý organdarynyń, jergilikti atqarýshy organdardyń ókilderinen jasaqtalǵan top júrgizetin reıdterdiń barysynda anyqtalǵan.

Sonymen qatar jergilikti polıtsııa qyzmetkerleri de sholǵyndaý barysynda karantın talaptarynyń buzylýyn anyqtap, isti Densaýlyq saqtaý mınıstrliginiń bólimshelerine jiberedi. Sol jerde ákimshilik aıyppul salý týraly sheshim qabyldanady», - dedi Baǵdat Qojahmetov.