Qazaqstanda medıtsınalyq qyzmetti tutyný deńgeıi áli de joǵary - T.Dúısenova

ASTANA. QazAqparat - Qazaqstanda medıtsınalyq qyzmetti tutyný deńgeıi áli de joǵary. Búgin Májilistegi «Nur Otan» partııasy fraktsııasynyń keńeıtilgen jınalysynda QR Densaýlyq saqtaý jáne áleýmettik damý mınıstri Tamara Dúısenova málim etti. Eske salaıyq, fraktsııa otyrysynda «Ólim kórsetkishi joǵary aýrýlarmen kúresý boıynsha memlekettiń atqaryp jatqan júıeli sharalary» taqyryby talqylanǵan bolatyn.

Mınıstrdiń aıtýynsha, 2005-2010 jáne 2011-2015 jyldar aralyǵynda júzege asyrylǵan densaýlyq saqtaý júıesin damytý jónindegi baǵdarlamanyń nátıjesinde Qazaqstanda kútiletin ómir súrý uzaqtyǵy  71 jasqa uzardy. Al halyqtyń jalpylama ólim-jitimi 15,3 paıyzǵa, ana men bala ólimi 1,8 esege tómendegen. «Halyqtyń densaýlyǵyna qatysty oń dınamıkaly kórsetkishtermen qatar, qazaqstandyqtardyń ómir súrý uzaqtyǵyna keri áser etetin faktorlar da barshylyq. Ondaı faktiler áserinen Qazaqstandaǵy kútiletin ómir súrý uzaqtyǵy EYDU elderine qaraǵanda tómen bolyp otyr. Budan bólek, Qazaqstanda ambýlatorııalyq jáne statsıonarlyq deńgeıde medıtsınalyq qyzmetti qabyldaý kórsetkishi áli de joǵary. Bul rette statsıonarlyq emdeýge baǵyttalatyn shyǵyndar bólinetin barlyq qarajattyń 50 paıyzyn quraıdy, al EYDU elderinde bul kórsetkish ortasha alǵanda úshten biri ǵana.  Búgingi kúni bir patsıentti statsıonarda emdeý, aýrýdy erte bastan anyqtaýdaǵy medıtsınalyq kómektiń túrlerine qatysty emdeletin úsh adamǵa ketetin shyǵynmen teń», - dedi T. Dúısenova.