Qazaqstanda medıtsınalyq qyzmetterge arnalǵan tarıfter bekitiledi

ASTANA. QazAqparat - Qazaqstanda medıtsınalyq qyzmetterge arnalǵan tarıfter bekitiledi. Bul jaıynda búgin Úkimettiń selektorlyq rejimdegi otyrysynda QR Densaýlyq saqtaý mınıstri Eljan Birtanov málim etti, dep habarlaıdy QazAqparat.

«Tamyz aıynda mınıstrliktiń mynadaı buıryqtary ázirlenip, qol qoıylady. Olar: tegin medıtsınalyq kómektiń kepildik berilgen kólemi aıasynda jáne mindetti áleýmettik medıtsınalyq saqtandyrý júıesindegi qyzmetterdi densaýlyq saqtaý sýbektilerinen satyp alý qaǵıdalaryn  bekitý, sondaı-aq medıtsınalyq qyzmetterge arnalǵan tarıfterdi bekitý týraly», - dedi mınıstr.

Onyń aıtýynsha, satyp alý qaǵıdalaryn ázirleý kezinde  mınıstrlik jekemenshik qyzmet kórsetýshiler úshin túrli kedergilerdi joıýǵa, sonymen qatar patsıenttiń senimi men medıtsınalyq qyzmetterdiń sapasy negizinde sharttyq mindettemelerdiń oryndalýyn baqylaýǵa basa nazar aýdarǵan.

«Qyzmet kórsetýshini tańdaý rásiminiń ashyqtyǵyn jetildirý maqsatynda qyzmet kórsetýshini tańdaý komıssııasyna birinshi ret «Atameken» UKP-nyń, medıtsınalyq qaýymdastyqtardyń, múddeli úkimettik emes uıymdardyń  ókilderi kirgiziletin bolady», - dedi Eljan Birtanov.