Qazaqstanda medıtsınalyq qyzmetterdiń elektrondy portaly iske qosyldy
«Bul densaýlyq saqtaý salasyn tsıfrlandyrýdyń taǵy bir joly sanalady. Búgin biz medıtsınalyq qyzmetterdi satyp alýdyń elektrondy portalyn iske qosamyz. Ótken jyldan beri dári-dármekterdi elektrondy túrde satyp alyp kelemiz. Sonyń arqasynda aıtarlyqtaı mol únem, ashyqtyq boldy. Medıtsınalyq qyzmetterdi elektrondy túrde satyp alýdan da sondaı áser kútemiz»,- dedi jaýapty hatshy portaldyń ilki jobasyn iske qosý aldynda.
Onyń atap ótýinshe, qarasha aıynyń ishinde ázirlemeniń barlyq testik sharalary aıaqtalady jáne 2020 jyldan bastap barlyq satyp alýlar medıtsınalyq qyzmetterdiń elektrondy portaly arqyly júzege asyrylady. Aıta keterligi, qazirgi ýaqytta tegin medıtsınalyq kómektiń kepildendirilgen kólemi arqyly satyp alynatyn qyzmetterdiń kólemi shamamen 1 trln teńgeni quraıdy.
«2020 jyldyń 1 qańtarynan bizde mindetti medıtsınalyq saqtandyrý iske qosylady. Al bul degenińiz, mindetti medıtsınalyq saqtandyrýdyń medıtsınalyq qyzmetter toptamasyn qamtamasyz etýge baǵyttalǵan qosymsha 570 mlrd teńge qarajat degen sóz. Sol arqyly bizdegi jalpy qarjylandyrý 55-60 paıyzǵa artyp, kelesi jyly shamamen 1,6 trln teńge bolady», - dedi Botagóz Jaqselekova.
Osy oraıda mınıstrliktiń jaýapty hatshysy medıtsınalyq qyzmetterdi satyp alýǵa memlekettik, sonymen qatar jeke kompanııalar da qatysa alatyndyǵyn basa aıtty.