Qazaqstanda medıtsınalyq qyzmetterdiń biryńǵaı tarıfteri jasalýda
ASTANA. 24 qarasha. QazAqparat - Qazaqstanda medıtsınalyq qyzmetterdiń biryńǵaı tarıfteri jasalý ústinde, dep habarlady QR Premer-Mınıstriniń resmı saıty.
«Birtutas ulttyq densaýlyq saqtaý júıesin engizýdiń aıasynda biryńǵaı tarıftik saıasat iske asyryldy. Mınıstrlik emdeý standarttaryn saqtaý kezinde qajetti shyǵystardy eseptep shyǵaryp, naýqasty tolyq emdeýge jáne onyń jazylyp shyǵýyna múmkindik beretin jeke bir oqıǵanyń tarıfin ázirledi», - dedi QR Densaýlyq saqtaý mınıstrliginiń Medıtsınalyq qyzmetke aqy tóleý komıteti tegin medıtsınalyq kómektiń kepildendirilgen kólemin saraptaý basqarmasynyń basshysy Naǵıma Nyǵmanova.
Oǵan qosa, 2012 jyldan bastap onkoregıstrde tirkelgen bir onkologııalyq naýqas úshin keshendi tarıf boıynsha tólem jasaý júıesi engizilip otyr. Bul jańa shara ár muqtaj naýqasty onkologııalyq keshendi kómekpen qamtamasyz etýge múmkindik beredi.
Esterińizge sala keteıik, Elbasynyń tapsyrmasy boıynsha Qazaqstanda Birtutas ulttyq densaýlyq saqtaý júıesin engizý jónindegi keshendi jumys júrgizilýde. Respýblıka halqyna sapaly jáne qoljetimdi medıtsınalyq qyzmet kórsetýdi qarastyratyn bul júıe «Salamatty Qazaqstan» memlekettik baǵdarlamasynyń aıasynda iske asyrylýda.
