Qazaqstanda Medıtsınalyq kadrlar resýrsynyń observatorııasy qurylady
ASTANA. 28 shilde. QazAqparat - QR Densaýlyq saqtaý mınıstrligi Kadrlyq resýrstar observatorııasyn qurý jónindegi sharalardy anyqtap otyr,
dep habarlady Ońtústik Qazaqstan memlekettik farmatsevtıkalyq akademııasynyń rektory Baqytjan Seksenbaev pm.kz saıtyna bergen suhbatynda.
"Prezıdent medıtsınalyq jáne farmatsevtıkalyq kadrlar jasaqtaý jónindegi naqty tapsyrma berdi, osyǵan baılanysty Densaýlyq saqtaý mınıstrligi Kadrlyq resýrstar observatorııasyn qurý sharalaryn anyqtap otyr", - dedi B.Seksenbaev.
Bul ınstıtýt medıtsınalyq jáne farmatsevtıkalyq kadrlarǵa suranysty zertteý maqsatynda qurylýda.
«Kadrlar observatorııasy medıtsınalyq qyzmetkerlerdiń biliktilik deńgeıine monıtorıng júrgizýge múmkindik beredi, sebebi densaýlyq saqtaý júıesinde jyl saıyn kúrdeli ózgertýler oryn alyp jatady. Medıtsınalyq joǵary oqý oryndary men kolledjderdiń túlekterin jáne tájirıbe júrgizýshi dárigerlerdi daıarlaý isin jaqsartý jáne olardyń biliktilikterin jetildirýmen aınalysý kerek», - dedi rektor óz sózinde.
B.Seksenbaevtyń aıtýynsha, elimizde eki táýelsiz testileý ortalyǵyn qurý qajet, bul ortalyqtar túlekterdiń, medıtsınalyq oqý oryndary tyńdaýshylarynyń bilim deńgeıin obektıvti anyqtaýǵa jáne olarǵa óz biliktilikterin qýattaýlaryna múmkindik beredi.
«Mundaı ortalyqtardy Astanada jáne Qaraǵandyda qurý josparlanýda. Jáne basqa 6 medıtsınalyq ınstıtýttyń bazasynda osy ortalyqtardyń bólimshelerin ashý josparlanýda. Ol jerlerge táýelsiz sarapshylar komıssııasy baryp, emtıhan qabyldaıtyn bolady», - dep túıindedi óz sózin ol.
