Qazaqstanda medıtsınalyq etıkany damytý baǵdarlamasy jasalady
ASTANA. QazAqparat - Qazaqstanda medıtsınalyq etıka men kommýnıkatıvtik daǵdylardy damytýdyń ulttyq baǵdarlamasy ázirlenip engiziledi, delingen 2016-2020 jyldarǵa arnalǵan densaýlyq saqtaýdy damytýdyń «Densaýlyq» memlekettik baǵdarlamasynyń jobasynda, dep habarlaıdy www.primeminister.kz.
«Densaýlyq saqtaý júıesiniń sapasy men iltıpattylyǵyn qamtamasyz etý úshin jurtshylyqty, bilim berý uıymdaryn, kásibı birlestikter men buqaralyq aqparat quraldaryn keńinen qatystyra otyryp, ulttyq medıtsına qyzmetkerleriniń medıtsınalyq etıkasy men kommýnıkatıvtik daǵdylaryn damytý baǵdarlamasy ázirlenedi jáne engiziledi», - dep basa aıtylǵan qujatta.
Budan ózge, patsıentterdiń qaýipsizdigin qamtamasyz etýdiń halyqaralyq tásilderin engizý maqsatymen qupııa aýdıtti qoldaný negizinde ulttyq medıtsınalyq qatelikterdi esepke alý jáne taldaý júıesi engiziletin bolady. Sonymen birge, ishinara qylmystyq jaýapkershilikten ákimshilik jáne kásibı jaýapkershilikke ótýmen, onyń ishinde medıtsınalyq qyzmetpen aınalysýǵa lıtsenzııasynan ýaqytsha nemese turaqty túrde aıyrýmen medıtsınalyq personaldyń jaýapkershilik júıesi qaıta qaralatyn bolady. «Klınıkalyq úderisterdi standarttaý úshin aýrýlardy dıagnostıkalaý men emdeýdiń otandyq jáne halyqaralyq klınıkalyq nusqaýlyqtary, hattamalary ázirlenetin bolady», - delingen baǵdarlama jobasynda.
Sapa standarttaryn engizý men tıimdiligin monıtorınglaýdy densaýlyq saqtaý salasyndaǵy ortalyq jáne jergilikti atqarýshy organdar, sonyń ishinde medıtsına qyzmetkerlerin oqytý, medıtsına uıymdaryn qosymsha jaraqtandyrý, medıtsınalyq kómekti qarjylandyrýdy jaqsartý jolymen qamtamasyz etetin bolady. Jergilikti sapany basqarý júıesiniń negizi medıtsına uıymdarynyń ishki aýdıt qyzmetteri bolady. Olardyń qyzmeti táýekelderdi basqarýdyń biryńǵaı júıesin engizýge jáne táýelsiz medıtsınalyq sarapshylar ınstıtýtyn qatystyra otyryp klınıkalyq úderisterdiń turaqty aýdıtin júrgizýge qurylǵan.
