Qazaqstanda medıtsınalyq-demografııalyq kórsetkishter jaqsaryp keledi
«Salamatty Qazaqstan» baǵdarlamasymen qarastyrylǵan is-sharalardy iske asyrý negizgi medıtsınalyq-demografııalyq kórsetkishterdi jaqsartýǵa baǵyttalǵan. Solardy oryndaýdyń arqasynda elimizde ana men bala óliminiń tómendeý úrdisi baıqalýda, dep habarlady pm.kz saıty.
«Qazir «Salamatty Qazaqstan-2015» memlekettik baǵdarlamasy iske asyrylýda. Densaýlyq saqtaý júıesi sapalyq turǵydan damý ústinde. Halyqtyń densaýlyq kórsetkishteri boıynsha oń serpinge qol jetkizilip otyr. Bala týý kórsetkishi men ómir jastyń uzaqtyǵy ulǵaıdy», - dep atap kórsetti Elbasy N.Nazarbaev «Áleýmettik-ekonomıkalyq jańartý -Qazaqstan damýynyń basty baǵytty» atty Joldaýynda.
Densaýlyq saqtaý mınıstrliginiń aqparatyna súıensek, 2012 jyldyń І jartyjyldyǵynda ana ólimi 13 paıyzǵa tómendegen jáne ár 100 myń tiri týǵandarǵa qatysty 15,4 kórsetkishti quraǵan. 2011 jyly bul kórsetkish 17,7-ge teń bolǵan edi. Oǵan qosa, shaqalaq óliminiń kórsetkishi 5,1 paıyzǵa tómendep, tiri týylǵan 1000 balaǵa 14,8-di quraǵan.
Sondaı-aq, ótken jartyjyldyqta halyqtyń tabıǵı ósimi ár 1000 adamǵa shaqqanda 13,90-ǵa ulǵaıǵan, 2011 jyly bul kórsetkish 13,02 bolǵan edi. Bala týý kórsetkishi 22,29-dan 22,77-ge ósse, ólim-jitim kórsetkishi ár 1000 adamǵa shaqqanda 9,27-den 8,87-ge deıin tómendegen.
Halyqtyń tabıǵı ósiminiń eń joǵary kórsetkishi Ońtústik Qazaqstan oblysynda (25,60), Mańǵystaý oblysynda (24,05), Qyzylorda oblysynda (22,05), Atyraý oblysynda (21,09), Jambyl oblysynda (19,66), Almaty oblysynda (16,01), Aqtóbe oblysynda (14,50) jáne Astana qalasynda (19,56) tirkelip otyr..
Aıta ketý kerek, halyqtyń aýrýlarǵa shaldyǵý kórsetkishi ár 100 myń adamǵa shaqqanda 56463,47-den 56098,22-ge deıin tómendegen. Halyqtyń týberkýlez aýrýyna shaldyǵý kórsetkishi de tómendegen jáne ár 100 myń adamǵa shaqqanda 86,09-dy quraǵan, 2011 jyldyń sáıkes kezeńinde bul kórsetkish 94,6 bolǵan edi. Týberkýlezden bolǵan ólim-jitim de ótken jylmen salystyrǵanda 8,6-dan 7,4-ke (100 myń adamǵa shaqqanda) tómendegen.
Oǵan qosa, aǵymdaǵy jyldyń 5 aıynda qan aınalymy aýrýlarynan bolǵan ólim-jitim kórsetkishi de edáýir tómendegen, ár 100 myń adamǵa shaqqanda 2501-di quraǵan. 2011 jyldyń osy kezeńinde bul kórsetkish 397,9 bolǵan edi.
«Salamatty Qazaqstan» baǵdarlamasynyń aıasynda profılaktıkalyq sharalar, skrınıgilik zertteýler, ana men bala ólimin, áleýmettik mańyzdaǵy aýrýlardy azaıtýǵa, medıtsınalyq qyzmetterdiń sapasyn jaqsartýǵa múmkindik beretin basqa da sharalar qabyldanýda.
