Qazaqstanda medıtsına mekemesi ǵımarattarynyń 44,7 paıyzy tozǵan
ASTANA. QazAqparat – Densaýlyq saqtaý mınıstri Ajar Ǵınııat tozyńqy aýrýhana ǵımarattary jáne jańadan salynatyn densaýlyq saqtaý obektileri týraly málimdeme jasady, dep habarlaıdy QazAqparat tilshisi.
«Búginde respýblıka boıynsha 6 myńnan astam memlekettik densaýlyq saqtaý obektisi halyqqa medıtsınalyq qyzmet kórsetip otyr. Onyń ishinde 492 aýrýhana jáne 5695 medıtsınalyq-sanıtarııalyq alǵashqy kómek nysany bar. Medıtsınalyq uıym ǵımarattarynyń tozý deńgeıi - 44,7%. Atap aıtqanda, statsıonarlar ǵımaratynyń tozýy - 43,5%, al medıtsınalyq-sanıtarııalyq alǵashqy kómek uıymdary - 41,9%. Sonymen qatar eldegi jumys istep turǵan statsıonarlardyń kópshiligi halyqaralyq standart talaptaryna sáıkes kelmeıdi», - dedi Ajar Ǵınııat Úkimet otyrysynda
Onyń aıtýynsha, Memleket basshysynyń tapsyrmasyna sáıkes aýylda densaýlyq saqtaýdy jańǵyrtý jumysy júrip jatyr.
«Ulttyq joba aıasynda 655 medıtsınalyq-sanıtarııalyq alǵashqy kómek ortalyǵy salynady. Sondaı-aq, el boıynsha 32 kópbeıindi aýdandyq ortalyq aýrýhana kúrdeli jóndeýden ótip, qaıta jańartylady. Atalǵan sharalar aýyl turǵyndaryna medıtsınalyq kómektiń qoljetimdiligin qamtamasyz etýge múmkindik beredi», - deıdi mınıstr.
Odan bólek, A. Ǵınııat qalalarda birneshe densaýlyq saqtaý mekemesi salynatynyn habarlady.
- Astana jáne Almaty qalalarynda 2 ǵylymı-ınnovatsııalyq kópbeıindi klınıka;
- memlekettik-jekemenshik áriptestik sheńberinde 8 kópbeıindi aýrýhana;
- 12 perınataldy ortalyq;
- onkologııa ortalyqtarynyń jelisi.
Sonymen qatar, búginde myna óńirlerde qurylys jalǵasyp jatyr:
- Qostanaı, Almaty oblystarynda 3 aýdandyq emhana;
- Qyzylorda, Pavlodar oblystarynda 2 kópbeıindi aýrýhana (qaıta jóndeý);
- Mańǵystaý oblysynda aýdandyq ortalyq aýrýhana;
- Qyzylorda qalasynda qan ortalyǵy.
