Qazaqstanda medıtsına qyzmetkerleriniń mártebesin qutqarýshylarmen teńestirý usynyldy

NUR-SULTAN. QazAqparat – «QAZMED» medıtsına jáne onymen sabaqtas salalar qyzmetkerleriniń salalyq kásipodaǵynyń tóraǵasy Álıaqbar Mátishev medıtsınalyq qyzmetker qandaı kómek alýy kerektigi jaıly pikir bildirdi, dep habarlaıdy QazAqparat tilshisi.

«Ústemeaqy barlyq qyzmetkerge, búkil personalǵa – búgingi tańda aýrýhanalarda koronavırýs ınfektsııasymen tynymsyz kúresip jatqan dárigerlerden bastap medbıkelerge, kúzetshiler men jedel járdem júrgizýshilerine berilýi tıis. Buǵan qosa vırýs juqtyrǵan personal qosymsha ústemeaqy alýy kerek», - dedi Álıaqbar Mátishev OKQ-da ótken baspasóz máslıhatynda.

Álıaqbar Mátishevtyń aıtýynsha, koronavırýspen, pnevmonııamen aýyrǵandardyń bári de ońaltýdan ótýi qajet. Sondaı-aq olardyń balalary da kútimde bolýy tıis. Sonymen qatar ol medıtsınalyq qyzmetkerler shıpajaılarda densaýlyǵyn ońaltýy kerektigin de jetkizdi.

«Máselen bir otbasyndaǵy eki adam medıtsına salasynda eńbek etip, ekeýi de úıine bara almaı, qyzmet etip jatýy yqtımal. Olardyń balalary qaıda barmaq? Meniń oıymsha, osyndaı qyzmetkerlerdiń balalaryna arnalǵan balabaqsha jumys isteýi tıis. Sonymen qatar aldaǵy ýaqytta medıtsına qyzmetkerlerin turǵyn úı men turmystyq turǵyda kótermeleý, tólemaqy berý, baspana alǵany úshin ótemaqy berý tetikterin qarastyrǵan abzal», - dedi ol.

Álıaqbar Mátishev sonymen qatar medıtsınalyq qyzmetkerlerge aılyǵy ýaqytynda berilip otyrýy kerektigin málim etti.

«Medıtsınalyq qyzmetkerlerge qutqarýshylarda bar mártebeni berý kerek. Olarǵa pandemııa ýaqytynda zańǵa sáıkes áleýmettik qoldaýdyń barlyq sharasy kórsetilýi kerek», - dedi ol.