Qazaqstanda medıtsına qyzmetkerleriniń bilimi táýelsiz ortada baǵalanatyn bolady
QR Densaýlyq saqtaý mınıstrliginiń Sapa jónindegi birikken komıssııasy densaýlyq saqtaý salasyndaǵy mamandardyń kásibı daıarlyǵyn baǵalaýdy jáne biliktilik sáıkestiligin rastaýdy júzege asyrý úshin 2017 jyldyń 28 jeltoqsanynda «Táýelsiz emtıhan alý ulttyq ortalyǵy» ózin-ózi retteıtin uıymyn akkredıttedi.
Qaıta retteý jáne qyzmetterdi táýelsiz ortaǵa berý sharalary aıasynda 2018 jyldyń qańtar aıynan bastap Densaýlyq saqtaýdy damytý respýblıkalyq ortalyǵynyń (DSDRO) qurylymyndaǵy Bilimdi jáne daǵdylardy baǵalaý ortalyǵy taratyldy.
2018 jyldyń qańtar aıynan sapaly jáne ashyq túrde (transparentti) táýelsiz emtıhan alýǵa arnalǵan halyqaralyq talaptarǵa saı ázirlengen Dúnıejúzilik bank jobasynyń aıasynda kiriktirilgen aqparattyq júıe (KAJ) tolyq masshtabta engizile bastaıdy.
KAJ dárigerler, medıtsınalyq joǵary oqý oryndary men kolledjderiniń túlekteri, rezıdentter, ınternder úshin teorııalyq jáne tájirıbelik emtıhan ótkizýdi qamtamasyz etedi. Tirkelý, test tapsyrý jáne nátıjelerin esepteý adamı faktordyń áserinsiz avtomatty túrde júzege asyrylady. Ár úmitker úshin kúnin, saǵatyn tańdap, emtıhan tapsyrýǵa ótinim berýge jáne onyń barysyn tekserýge múmkindik beretin jeke elektrondy kabınet jasalady. Testileý nátıjeleri sol sátte-aq turaqty jumys isteıtin úmitkerdiń jeke kabınetine jiberiledi jáne ony joıý nemese ózgertý múmkin emes.
Medıtsına qyzmetkerleriniń bilimderi men daǵdylaryn baǵalaý qyzmetiniń táýelsiz ortaǵa berilýine baılanysty, osy jyldyń qańtarynan kásibı daıarlyǵyn baǵalaýdan ótý jáne biliktilik sanatyna sáıkestiligin rastaý úshin medıtsına qyzmetkerlerinen ótinimderdi úkimettik emes uıym - Táýelsiz emtıhan alý ulttyq ortalyǵy qazexam.kz saıty arqyly qabyldaıtyn bolady.
DSDRO meken-jaıyna ótinim berip, baǵalaý jónindegi qyzmetke aqy tólep qoıǵan, biraq qyzmet kórsetilmegen úmitkerler emtıhan bolatyn kúni sol jerde, nemese qazexam.kz saıtynda onlaın túrde Táýelsiz emtıhan alý ulttyq ortalyǵy usynǵan ótinishtiń qosymsha nysanyn toltyrǵan jaǵdaıda, belgilengen merzimde baǵalaýdan ótedi.
Qabyldanǵan sharalar tájirıbelik qyzmetke ruqsat etý úshin medıtsınalyq qyzmetkerlerdiń bilimderi men daǵdylaryn baǵalaý sapasyn jáne senimdiligin arttyrady, baǵalaý kezinde sybaılas jemqorlyq qaýipterin boldyrmaıdy jáne qoǵamdyq densaýlyq saqtaýdy sapasyz daıarlanǵan mamandardan qorǵaýǵa baǵyttalady.