Qazaqstanda medıtsına qyzmetkerlerine sanattar berý men sertıfıkattaý boıynsha jańa zań normalary kúshine endi

ASTANA. QazAqparat - 2015 jyldyń 9 qazanynan bastap densaýlyq saqtaý salasy mamandaryn sertıfıkattaý men biliktilik sanatyn berý protsedýralaryn retteý maqsatynda «Halyq densaýlyǵy jáne densaýlyq saqtaý júıesi týraly» QR Kodeksiniń jańa normalary kúshine enedi, dep habarlaıdy QR Densaýlyq saqtaý jáne áleýmettik damý mınıstrliginiń baspasóz qyzmetinen.

Joǵaryda atalǵan normalarǵa sáıkes, medqyzmetkerlerdiń bilimi men mashyqtaryn akkredıtelgen uıym baǵalaıtyn bolady.

2015 jyldyń 16 qyrkúıeginde QR DSÁDM Medıtsınalyq jáne farmatsevtıkalyq qyzmetti baqylaý komıteti Densaýlyq saqtaýdy damytý respýblıkalyq ortalyǵyn densaýlyq saqtaý salasynyń mamandary biliktiliginiń sáıkestigi men kásibı daıyndyǵyn baǵalaý quqyǵyn berý úshin akkredıttedi. DSDRO-ǵa akkredıtteý týraly kýálik 4 jyl merzimge berildi. DSDRO sarapshylary medqyzmetkerlerdi baǵalaý jumysyn barlyq oblys ortalyqtary, Astana jáne Almaty qalalarynda ótkizetin bolady. Úmitkerler oń baǵa alǵannan soń, klınıkalyq praktıkaǵa ruqsat alý úshin mamannyń sertıfıkaty nemese biliktilik sanatyn berý kýáligin alý maqsatynda komıtetterdiń aımaqtyq departamentterine habarlasa alady.